Шавкат Мирзиёев «Лукойл» президенти Вагит Алекперовни қабул қилди

Ўзбекистон Президенти Шавкат Мирзиёев 5 март, жума куни, Россиянинг «Лукойл» компанияси президенти Вагит Алекперовни қабул қилди. Бу ҳақда Президент матбуот хизмати хабар берди.

Қайд этилишича, давлат раҳбари меҳмонни қутлар экан, жаҳоннинг етакчи энергетик корпорацияларидан бири ва Ўзбекистон нефть-газ комплексининг муҳим инвестори — «Лукойл» билан стратегик шерикликда сезиларли ривожланишга эришилганини алоҳида таъкидлади.

Бугунги кунда компаниянинг қўшма лойиҳаларга киритган сармоялари ҳажми 10 миллиард доллар атрофида. Йилига 8 миллиард куб метрдан зиёд табиий газни қайта ишлаш қувватига эга Қандим газни қайта ишлаш мажмуаси муваффақиятли фаолият юритмоқда. Жануби-ғарбий Ҳисор ва Устюртдаги конларни ўзлаштириш давом этяпти. Бундан ташқари, «Лукойл» Ўзбекистондаги ижтимоий дастурларни фаол қўллаб-қувватламоқда.

Учрашувда ўзаро манфаатли ҳамкорликни янада кенгайтириш истиқболлари кўриб чиқилди.

Компаниянинг корпоратив бошқарув ва нефть-газ тармоғида рақамли технологияларга ўтиш борасидаги тажрибаси ва илғор ечимларини жалб этиш масаласига алоҳида эътибор қаратилди.

Ўзбекистон ҳудудида геология-қидирув соҳасида ҳамда углеводород конларини, шу жумладан, қазиб олиниши қийин бўлганларини ўзлаштириш борасида кооперацияни мустаҳкамлаш имкониятлари муҳокама қилинди.

Илмий изланишлар ҳамда энергетика сектори учун юқори малакали кадрларни тайёрлаш соҳасида ҳамкорлик қилиш устувор йўналиш сифатида белгилаб олинди.

Эслатиб ўтамиз, Ўзбекистон «Лукойл» томонидан қазиб олинган газнинг бир қисмини ички бозорга жалб қилгани сабабли мазкур компаниядан 600 миллион доллар миқдорида қарздор бўлган.