So‘nggi vaqtda ijtimoiy tarmoqlar foydalanuvchilari Toshkent shahar ichki ishlar bosh boshqarmasiga davlat raqami o‘qib bo‘lmaydigan holatga keltirilgan avtomobillar suratlarini tez-tez jo‘natmoqda. Bu haqda boshqarma matbuot xizmati xabar berdi.
Qayd etilishicha, suratlarda ko‘pincha avtomobillar davlat raqamlari bo‘yoq bilan bo‘yalgan yoki ulardagi harflar ustiga biror narsa yopishtirilganligi, raqamlari ustidan turli plyonka tortishlari aks etgan (bu bilan raqamlarni radarlar uchun “ko‘rinmas” holga keltirmoqchi bo‘ladilar). Ba’zida raqamlarni rasvo holatga keltirishadi. Bunday holatning g‘ayritabiiyligi avtomobilning kuzovi yarqiraydigan darajada tozaligi bilan ko‘zga tashlanadi.
Yo‘l harakati qoidalarida bir qator shartlar borki, ular yuzaga kelganda avtomobildan foydalanish taqiqlanadi. Ular qatorida davlat raqam belgilarining yetarli darajada ko‘rinmaslik holat ham qayd etilgan. Haydovchi muntazam ravishda avtomobilining holati foydalanish shartlarining barchasiga muvofiq ekanligiga ishonch hosil qilib turishi lozim. Aks holda jarima maydonchasiga tushib qolish mumkin.
Bildirilishicha, 28-fevral kuni ijtimoiy tarmoqlarning foydalanuvchilaridan biri ulashgan suratda Matiz rusumli avtomobil davlat raqamining ikkita belgisi ustiga puxtalik bilan qog‘oz yopishtirgani aks etgan. Qo‘shimcha tarzda xuddi shu avtomobilning boshqa rakursdan tushirilgan surati ham jo‘natilgan edi: unda old tomondagi davlat raqamlari talablarga muvofiq holatda edi.
Shu kunning o‘zida Toshkent shahar IIBB YHXB YPX xodimlari avtomobilni ishonchnoma asosida boshqargan haydovchi 31 yoshli H.M.ga nisbatan O‘zbekiston Respublikasi Ma’muriy javobgarlik to‘g‘risidagi kodeksining 125- (“Transport vositalaridan foydalanish qoidalarini buzish”) hamda 128-6-moddalariga (“Transport vositalari haydovchilarining to‘xtash yoki to‘xtab turish qoidalarini buzishi”) muvofiq bayonnoma rasmiylashtirdi.
Eslatib o‘tilishicha, “davlat raqam belgisi yasama yoki o‘zga usullarda o‘zgartirilgan transport vositalarini, xuddi, shuningdek davlat raqam belgisi ayni shu transport vositasiga tegishli bo‘lmagan transport vositasini boshqarish – bazaviy hisoblash miqdorining o‘n baravari miqdorida jarima solishga sabab bo‘ladi” (2 230 000 so‘m). O‘zbekiston Respublikasi Ma’muriy javobgarlik to‘g‘risidagi kodeksning 291-moddasiga muvofiq, mazkur hollarda qoidabuzarning transport vositasi jarima maydonchasiga joylanadi.
“Hurmatli haydovchilar! Yo‘l harakati qoidalarini buzmang, buzgan taqdiringizda esa yosh bola kabi turli uslublar bilan mas’uliyatidan qochib qolmoqchi bo‘lmang.
Shuningdek, fuqarolik pozitsiyasini namoyon qilib, bizga qoidabuzarlar haqida xabar beruvchilarga murojaat qilmoqchimiz: avtomobilning ikkala davlat raqamlarini surati (old va orqa tomondagilar) hamda qoidabuzarlik vaqti va joyi haqida ma’lumot bo‘lishi kerak. Sizning yordamingiz sababli poytaxt yo‘llari xavfsizroq bo‘lmoqda, chunki jazolanmasligiga ishongan haydovchidan yomoni yo‘q”, — deyiladi IIBB xabarida.
Izoh (0)