Samarqand viloyati Oqdaryo tumanida aholining qarovsiz qolgan qo‘y va tovuqlariga hujum qilayotgan shoqol yo‘q qilindi. Bu haqda Samarqand viloyati IIB xabar berdi.
Ma’lum qilinishicha, 2020-yilning mart oyi boshida tungi vaqtlarda Oqdaryo tumani Yangihayot, Yangiqo‘rg‘on hamda Galaravot qishloqlaridagi xonadonlarda ochiq va qarovsiz qolgan qo‘y va tovuqlarga yovvoyi hayvon hujum qilib ketayotganligi haqida gap-so‘zlar tarqalgan.
Holatni o‘rganish maqsadida tuman ichki ishlar bo‘limi, tuman hokimligi, tuman DSENM va ko‘ngilli fuqarolardan iborat ishchi guruh tuzilgan.
IIB tomonidan ma’lum qilinishicha, 4-mart, chorshanba kuni, tuman hududidagi ovchilik jamiyatiga a’zo bo‘lgan ovchilar ko‘ngilli ravishda tadbirga jalb etilgan va “Yangihayot” mahallasi qishloqlaridagi xonadonlarda tekshirish ishlari tashkil qilingan.
Shu kuni taxminan soat 16:00 da Yangihayot qishlog‘idan o‘tib ketayotgan shoqol aniqlangan va ovchilar tomonidan otib tashlangan.
Avvalroq Xorazmda bir haftada 20 ta qo‘yni bo‘g‘izlagan yovvoyi it o‘ldirilgan. Pastdarg‘omda esa bir necha mahallani qo‘rquvga solgan yirtqich hayvonlar ushlangan.
Izoh (0)