Самарқанд вилояти Оқдарё туманида аҳолининг қаровсиз қолган қўй ва товуқларига ҳужум қилаётган шоқол йўқ қилинди. Бу ҳақда Самарқанд вилояти ИИБ хабар берди.
Маълум қилинишича, 2020 йилнинг март ойи бошида тунги вақтларда Оқдарё тумани Янгиҳаёт, Янгиқўрғон ҳамда Галаравот қишлоқларидаги хонадонларда очиқ ва қаровсиз қолган қўй ва товуқларга ёввойи ҳайвон ҳужум қилиб кетаётганлиги ҳақида гап-сўзлар тарқалган.
Ҳолатни ўрганиш мақсадида туман ички ишлар бўлими, туман ҳокимлиги, туман ДСЭНМ ва кўнгилли фуқаролардан иборат ишчи гуруҳ тузилган.
ИИБ томонидан маълум қилинишича, 4 март, чоршанба куни, туман ҳудудидаги овчилик жамиятига аъзо бўлган овчилар кўнгилли равишда тадбирга жалб этилган ва «Янгиҳаёт» маҳалласи қишлоқларидаги хонадонларда текшириш ишлари ташкил қилинган.
Шу куни тахминан соат 16:00 да Янгиҳаёт қишлоғидан ўтиб кетаётган шоқол аниқланган ва овчилар томонидан отиб ташланган.
Аввалроқ Хоразмда бир ҳафтада 20 та қўйни бўғизлаган ёввойи ит ўлдирилган. Пастдарғомда эса бир неча маҳаллани қўрқувга солган йиртқич ҳайвонлар ушланган.
Изоҳ (0)