Namanganda voyaga yetmaganlarga ijtimoiy-psixologik yordam ko‘rsatish markazi faoliyati yo‘lga qo‘yildi. Bu haqda viloyat prokuraturasida bo‘lib o‘tgan matbuot anjumanida ma’lum qilindi, deya xabar beradi “Daryo” muxbiri Azizbek Abduvaliyev.
Viloyat prokuraturasi tashabbusi bilan Namangan shahar xalq ta’lim bo‘limi binosida tashkil etilgan markazni moslashtirish uchun 70 million so‘mga yaqin mablag‘ sarflanib, uchta — qabul, bolalar bilan ishlash va trening xonalari ajratildi. Yakshanbadan tashqari har kuni 3 nafar, viloyat bo‘yicha jami 90 nafar tajribali psixolog bu yerda faoliyat olib bormoqda. Ular tomonidan kuniga o‘rtacha 10-15 nafar o‘quvchi qabul qilinmoqda.
Markazda 24 soat ishlaydigan “Ishonch telefoni” o‘rnatilgan bo‘lib, uning raqamlari shahardagi barcha maktab o‘quvchilarining kundalik daftarlariga stiker tariqasida yopishtirilgan. “Agar sizda ota-onangiz, maktabdagi do‘stlaringiz bilan muammo bo‘lsa yoki o‘zingizni yolg‘iz his qilib, yaqin suhbatdosh topa olmayotgan bo‘lsangiz, bizga qo‘ng‘iroq qiling”, — deyiladi ushbu stikerda.
— O‘tgan yil sentabrida faoliyat boshlagan bo‘lsak, hozirgacha bizga murojaat etganlar soni 500 nafardan oshib ketdi. Bolalar ko‘pincha ota-onalari yoki maktab psixologlari bilan birga keladi. Oralarida boshlang‘ichdan tortib yuqori sinf o‘quvchilarigacha bor. Ularni qiynayotgan muammolarni tinglab, vaziyatdan chiqib ketish bo‘yicha tavsiyalar beramiz, maxsus treninglar o‘tamiz. Mashg‘ulotlardan keyin ham o‘quvchi bir oy davomida kuzatuvimiz ostida bo‘ladi, — deydi shahar xalq ta’limi bo‘limi uslubchi-psixologi Dilshodbek Abdullayev.
Viloyat prokurorining voyaga yetmaganlar haqidagi qonunchilik ijrosi ustidan nazorat bo‘yicha katta yordamchisi Sardor Nishonovga ko‘ra, viloyat prokuraturasi tomonidan Respublika tashxis markazi bilan hamkorlikda “O‘quvchilardagi ruhiy va ijtimoiy muammolarning oldini olish bo‘yicha amalga oshiriladigan tadbirlar yuzasidan amaliyotchi psixologlar va o‘qituvchilar uchun uslubiy qo‘llanma” tayyorlangan. 1300 nusxada chop etilishi ko‘zda tutilayotgan ushbu kitob yaqin oradagi viloyatdagi barcha maktablarga bepul tarqatiladi.
Voyaga yetmaganlar o‘rtasida o‘z joniga qasd va suiqasd holatlarining oldini olish uchun xorijiy davlatlar, xususan, Yaponiya va Janubiy Koreya tajribasidan mahalliy sharoitdan kelib chiqib foydalanilmoqda. Psixologik testlar yordamida tushkun kayfiyatdagi bolalar aniqlanib, ularga alohida e’tibor qaratilmoqda.
— Asosiysi, “jinoyatchilikka moyil” degan atamani umuman qo‘llamaslikka harakat qilyapmiz. Viloyat bo‘yicha 940 nafar ijtimoiy-huquqiy himoyaga muhtoj bola aniqlanib, shahar-tumanlar kesimida prokuratura xodimlariga biriktirildi. Viloyat prokurori Akmalxo‘ja Mavlonov tomonidan har chorshanba yoshlar bilan uchrashuvlar tashkil etilmoqda. Yaqinda Popda bo‘lib o‘tgan muloqotdan so‘ng yoshlardan bir guruhi tumandagi jazoni o‘tash koloniyasiga taklif qilindi. Bu yerdagi tanishuvdan so‘ng ulardan fikrlarini so‘raganimizda “bunday joylarni yelkamizning chuquri ko‘rsin” degan xulosani aytishdi, — deydi Sardor Nishonov.
Izoh (0)