Andijonlik Jasurbek Hamroqulov Andijon shahar 6-son IIB profilaktika inspektori Sardor Abdumannopov tomonidan 2019-yil 11-sentabr kun IIB binosida kaltaklangani haqida xabar berilgan edi.
O‘zbekiston Ichki ishlar vazirligi mazkur holat yuzasidan ma’lumot bergan edi. Vazirlik tomonidan ma’lum qilinishicha, Jasurbek Hamroqulov 2019-yilning 11-sentabrida soat chamasi 22:30 da Andijon shahri Nodira ko‘chasida joylashgan “Kamelot” kafesi oldida janjal chiqargan. Voqea joyiga yetib kelgan IIB profilaktika inspektori Sardor Abdumannopov uni tinchlantirishga uringan paytida faol qarshilikka uchragan. Qayd etilishicha, shundan so‘ng fuqaro Jasurbek Hamroqulov hududiy ichki ishlar bo‘limiga olib kelinib, belgilangan tartibda ro‘yxatdan o‘tkazilgan. Mast holatda bo‘lgan Jasurbek Hamroqulov bu yerda ham xodimlarga faol qarshilik ko‘rsatgan.
Mazkur holat Andijon viloyatining prokuratura organlari tomonidan atroflicha o‘rganib chiqilib, Jasurbek Hamroqulovga nisbatan O‘zbekiston Respublikasi Jinoyat kodeksining 219-moddasi 1-qismi (Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) va 277-moddasi 2-qismi (Bezorilik) bilan ayb e’lon qilingan. Hozirda jinoyat ishi O‘zbekiston Respublikasi Jinoyat protsessual kodeksining 388-moddasi tartibida sud muhokamasiga yuborilgan.
Bosh prokuratura ham mazkur holat yuzasidan xabar bergan va ochilgan jinoiy ish tafsilotlarini ma’lum qilgan. Unga ko‘ra, IIB profilaktika inspektori Jasurbek Hamroqulovni tinchlantirishga uringan paytda u IIB xodimiga bo‘ysunishni xohlamagan. Jasur Hamroqulov inspektorning qonuniy talablarini bajarishdan bo‘yin tovlab, unga faol qarshilik ko‘rsatgan hamda xodimning egnida bo‘lgan xizmat kiyimidagi pogonini yulib olgan.
2020-yilning 9-yanvar kuni Jasur Hamroqulovga nisbatan mazkur jinoyat ishi yuzasidan Jinoyat kodeksining 219-moddasi 1-qismi, 277-moddasi 2-qismi “g” bandi bilan ayblov e’lon qilinib, unga nisbatan munosib xulq-atvorda bo‘lish haqida tilxat ehtiyot chorasi qo‘llanilgan.
Yuqoridagilarga asosan Andijon shahar prokuraturasi tomonidan ishning inspektor Sardor Abdumannopovga tegishli bo‘lgan qismi tergov muhokamasidan chiqarib tugatilgan. Mazkur jinoyat ishi 2020-yil 11-yanvar kuni mazmunan ko‘rib chiqish uchun ayblov xulosasi bilan Jinoyat ishlari bo‘yicha Andijon shahar sudiga yuborilgan.
Keyinroq O‘zbekiston Oliy sudi ham mazkur holat bo‘yicha olib borilayotgan ish yuzasidan ma’lumot bergan edi.
O‘zbekiston Oliy sudi tomonidan ma’lum qilinishicha, 7-fevral, juma kuni, “Sevimli” telekanali orqali fuqaro Jasurbek Hamroqulov ishiga oid sud jarayoni boshlangani haqida ko‘rsatuv namoyish etilgan. Ko‘rsatuvda muallif, “Sevimli” telekanalining Andijon viloyati bo‘yicha muxbiri G.Rustamova tomonidan jurnalistlarning sud zaliga qo‘yilmaganligi ta’kidlangan. Oliy sud tomonidan qayd etilishicha, “Sevimli” telekanali orqali namoyish etilgan telelavhada ta’kidlanganidek, 7-fevral kuni bo‘lib o‘tgan birinchi sud majlisiga jurnalistlarning kiritilmagani masalasi o‘rganilganida, sud raisiga sud jarayonini tasvirga olish, jurnalistlarning ishtirok etishi bo‘yicha yozma murojaat yoki iltimosnoma kelib tushmagan.
Mazkur voqealar ortidan holatning asosiy qahramoni bo‘lgan Jasurbek Hamroqulov videomurojaat bilan chiqdi va IIB xodimlaridan uzr so‘radi.
Jasurbek Hamroqulovning aytishicha, bir necha kun avval “Sevimli” telekanalida uning ichki ishlar idoralari xodimlaridan kaltak yeganligi haqida efirga uzatilgan lavhada voqealar bo‘rttirib ko‘rsatilgan.
Uning ma’lum qilishicha, mazkur holat yuzasidan prokuratura tomonidan dastlabki tergov harakatlari olib borilgan va ichki ishlar xodimlari noqonuniy harakat qilmaganligini aniqlangan. Mazkur ish sudga yuborilgan va ayni paytda sud jarayoni ketmoqda.
Jasurbek Hamroqulov “Sevimli” telekanali mazkur holatni bo‘rttirib yuborgani uchun ichki ishlar idoralari xodimlaridan uzr so‘ragan. Shuningdek, u mazkur videoni olishga uni hech kim majbur qilmagani va tazyiq o‘tkazmaganini aytgan.
2018-yilda Andijon viloyati Bo‘z tumanida IIB xodimidan kaltak yegan yigitning otasi IIB xodimini emas, balki bu voqeani videoga olgan shaxsni jazolashni so‘ragan edi.
Izoh (0)