Наманганда вояга етмаганларга ижтимоий-психологик ёрдам кўрсатиш маркази фаолияти йўлга қўйилди. Бу ҳақда вилоят прокуратурасида бўлиб ўтган матбуот анжуманида маълум қилинди, дея хабар беради «Дарё» мухбири Азизбек Абдувалиев.
Вилоят прокуратураси ташаббуси билан Наманган шаҳар халқ таълим бўлими биносида ташкил этилган марказни мослаштириш учун 70 миллион сўмга яқин маблағ сарфланиб, учта — қабул, болалар билан ишлаш ва тренинг хоналари ажратилди. Якшанбадан ташқари ҳар куни 3 нафар, вилоят бўйича жами 90 нафар тажрибали психолог бу ерда фаолият олиб бормоқда. Улар томонидан кунига ўртача 10-15 нафар ўқувчи қабул қилинмоқда.
Марказда 24 соат ишлайдиган «Ишонч телефони» ўрнатилган бўлиб, унинг рақамлари шаҳардаги барча мактаб ўқувчиларининг кундалик дафтарларига стикер тариқасида ёпиштирилган. «Агар сизда ота-онангиз, мактабдаги дўстларингиз билан муаммо бўлса ёки ўзингизни ёлғиз ҳис қилиб, яқин суҳбатдош топа олмаётган бўлсангиз, бизга қўнғироқ қилинг», — дейилади ушбу стикерда.
— Ўтган йил сентябрида фаолият бошлаган бўлсак, ҳозиргача бизга мурожаат этганлар сони 500 нафардан ошиб кетди. Болалар кўпинча ота-оналари ёки мактаб психологлари билан бирга келади. Ораларида бошланғичдан тортиб юқори синф ўқувчиларигача бор. Уларни қийнаётган муаммоларни тинглаб, вазиятдан чиқиб кетиш бўйича тавсиялар берамиз, махсус тренинглар ўтамиз. Машғулотлардан кейин ҳам ўқувчи бир ой давомида кузатувимиз остида бўлади, — дейди шаҳар халқ таълими бўлими услубчи-психологи Дилшодбек Абдуллаев.
Вилоят прокурорининг вояга етмаганлар ҳақидаги қонунчилик ижроси устидан назорат бўйича катта ёрдамчиси Сардор Нишоновга кўра, вилоят прокуратураси томонидан Республика ташхис маркази билан ҳамкорликда «Ўқувчилардаги руҳий ва ижтимоий муаммоларнинг олдини олиш бўйича амалга ошириладиган тадбирлар юзасидан амалиётчи психологлар ва ўқитувчилар учун услубий қўлланма» тайёрланган. 1300 нусхада чоп этилиши кўзда тутилаётган ушбу китоб яқин орадаги вилоятдаги барча мактабларга бепул тарқатилади.
Вояга етмаганлар ўртасида ўз жонига қасд ва суиқасд ҳолатларининг олдини олиш учун хорижий давлатлар, хусусан, Япония ва Жанубий Корея тажрибасидан маҳаллий шароитдан келиб чиқиб фойдаланилмоқда. Психологик тестлар ёрдамида тушкун кайфиятдаги болалар аниқланиб, уларга алоҳида эътибор қаратилмоқда.
— Асосийси, «жиноятчиликка мойил» деган атамани умуман қўлламасликка ҳаракат қиляпмиз. Вилоят бўйича 940 нафар ижтимоий-ҳуқуқий ҳимояга муҳтож бола аниқланиб, шаҳар-туманлар кесимида прокуратура ходимларига бириктирилди. Вилоят прокурори Акмалхўжа Мавлонов томонидан ҳар чоршанба ёшлар билан учрашувлар ташкил этилмоқда. Яқинда Попда бўлиб ўтган мулоқотдан сўнг ёшлардан бир гуруҳи тумандаги жазони ўташ колониясига таклиф қилинди. Бу ердаги танишувдан сўнг улардан фикрларини сўраганимизда «бундай жойларни елкамизнинг чуқури кўрсин» деган хулосани айтишди, — дейди Сардор Нишонов.
Изоҳ (0)