Axborot va ommaviy kommunikatsiyalar agentligida 17-fevral, dushanba kuni, Davlat soliq qo‘mitasi rahbariyati ishtirokida jurnalist va blogerlar uchun matbuot anjumani tashkil etildi. Unda qo‘mita vakillari Soliq kodeksiga kiritilgan o‘zgartirish va qo‘shimchalarga oid savollarga javob qaytardi.
“Daryo” muxbiri Mirolim Isajonovning xabar berishicha, tadbirda jurnalistlarning “Tadbirkorlar faoliyati ustidan xronometraj tekshiruvi o‘tkazish jarayoni qachongacha davom etadi?”, degan savoliga DSQ raisi o‘rinbosari Fazliddin Umarov shunday javob berdi.
“O‘tgan ikki yil mobaynida Prezidentimiz topshirig‘i bilan tadbirkorlik subyektida tekshiruvlar o‘tkazish qat’iyan man qilindi. Lekin bu borada monitoring tahlili amalga oshirilgan. Xuddi shulardan biri xronometraj tadbiri edi. Bu tekshiruv o‘tgan yillarda amalda bo‘lgan qonunchilikka asosan, yetti kungacha o‘tkazilishi mumkin edi. Xronometraj tadbirkorlik subyektida haqiqiy savdo tushumini aniqlash maqsadida o‘tkaziladi. Tadbir natijasi bo‘yicha tadbirkorlarga nisbatan hech qanday chora ko‘rish nazarda tutilmagan.
Joriy yildan boshlab, xronometrajni to‘g‘ridan to‘g‘ri o‘tkazish tartibi qonunchilikda yo‘q. Buning o‘rniga sayyor tekshirish normasi kiritildi. Sayyor tekshiruvi ichida xronometraj ham o‘z aksini topgan. 1-aprelga qadar sayyor tekshiruvni o‘tkazish bo‘yicha me’yoriy hujjatni ishlab chiqish belgilangan va bu jarayon ayni paytda davom etyapti. Shu bois bugungi kunda xronometraj o‘tkazish amaliyoti mavjud emas”, — dedi Fazliddin Umarov.
Qo‘mita rasmiysining aytishicha, shu yilning birinchi choragi mobaynida tadbirkor moliyaviy yoki ma’muriy jazoga tortilmaydi. U yo‘l qo‘ygan kamchilik va xatolar soliqchilar bilan hamjihatlikda bartaraf etiladi.
“Soliq kodeksi normasi amalga kiritilib, soliq to‘lovchilarda ko‘nikma paydo bo‘lgunga qadar, ya’ni birinchi chorak davomida birorta tadbirkor faoliyati ustidan nazorat o‘tkazilmaydi. Agar ishbilarmonning o‘zi xatoga yo‘l qo‘yib va bu uchun unga nisbatan ma’muriy yoki moliyaviy jarima belgilansa, bu normalar ham bekor qilinadi. Xatolik yuzaga kelsa, buni soliq to‘lovchi bilan birga bartaraf etamiz, tushunmaganlarini esa o‘rgatamiz”, — dedi rais o‘rinbosari.
Izoh (0)