Namanganda “Antikoronavirus” maxsus taktik-o‘quv mashqi o‘tkazildi. Bu haqda “Daryo” muxbiri Azizbek Abduvaliyev xabar bermoqda.
Kosonsoy tumanidagi chegara-bojxona postida tashkil etilgan o‘quv mashqida viloyat hududiga o‘ta xavfli yuqumli kasalliklar, xususan, yangi koronavirus kirib kelishining oldini olishda tegishli xizmatlar hamkorligi, xalqaro tibbiy-sanitariya qoidalarini joriy etish tartibi amalda sinab ko‘rildi. Aloqa va markazlashtirilgan xabar berish tizimi hamda o‘zaro ma’lumot almashinuvi tekshiruvdan o‘tkazildi.
Ikki bosqich — chegara-bojxona postida tashkil etilgan sanitariya-karantin punkti va tibbiyot birlashmasida o‘tkazilgan mashqlar davomida o‘ta xavfli yuqumli kasallik bilan og‘rigan shaxslarni aniqlash, tashxis qo‘yish hamda bu haqda tegishli xizmatlarga xabar berish, bemorlarga birinchi tibbiy yordam ko‘rsatish va shifoxonaga evakuatsiya qilish, favqulodda vaziyatlar “sodir bo‘lgan” hududlarda nazorat o‘rnatish kabi jarayonlarning amalda bajarilishi kuzatib borildi.
Fuqaro muhofazasi tuzilmalari va epidemiyaga qarshi kurash guruhlari bilan ularning tayyorgarligi yuzasidan savol-javoblar, suhbatlar o‘tkazildi. Mashq yakunida esa yo‘l qo‘yilgan kamchiliklar va xatolarni bartaraf etish bo‘yicha fikr almashildi.
Viloyat favqulodda vaziyatlar boshqarmasi axborot xizmati rahbari Qahramon Sattorovga ko‘ra, tadbirga jami 250 kishi va 26 ta texnika jalb etildi.
Ikki soat davom etgan mashq mobaynida mas’ul xizmatlar tuzilmalari shaxsiy tarkibining harakatlari hamda biriktirilgan maxsus asbob-anjom va himoya vositalaridan foydalanish ko‘nikmalari takomillashtirildi. O‘ta xavfli yuqumli kasalliklar bilan bog‘liq favqulodda vaziyatlarda hamkorlikda harakat qilish darajasi qoniqarli baholandi.
Izoh (0)