Ijtimoiy tarmoqlarda “Sutkasiga 3 soat uxlaydigan hokimga iltimos: bir soatgina vaqt ajratib, Baliqchiga ham kelib keting!” sarlavhali xabar tarqaldi. Bu haqda Andijon viloyati hokimligi axborot xizmati ma’lum qildi.
Ushbu xabarda Baliqchi tumanidagi “Dog‘iston”, “Fayzobod”, “A’lam” va “Yuzchinor” MFYlaridagi bir qator muammolar, xususan, tabiiy gaz ta’minoti yo‘qligi yuzasidan e’tiroz bayon etilgan.
Mazkur xabar yuzasidan “Hududgaz Andijon” MChJ quyidagilarni ma’lum qildi:
Baliqchi tumanidagi yuqorida nomi zikr etilgan mahallalar tabiiy gaz ta’minoti yetib borishi qiyin bo‘lgan hududda joylashganligi sababli 2013-yildan tuman hokimining tegishli farmoyishiga asosan suyultirilgan gaz ta’minotiga o‘tkazilgan. Barcha MFYlar iste’molchilari bugungi kunda MChJning “Baliqchitumangaz” filiali tomonidan suyultirilgan gaz bilan ta’minlab kelinmoqda va ta’minlanish davriyligi o‘rtacha 40—45 kunni tashkil etadi.
Tumanning “A’lam” MFY o‘ramidagi 7 ta ko‘chada istiqomat qiluvchi 611 ta aholi xonadonida jami 660 dona maishiy gaz balloni mavjud. Yanvar oyida mazkur MFY iste’molchilariga rejaga ko‘ra 7900 kilogramm suyultirilgan gaz yetkazib berilishi kerak bo‘lsa, amalda bu ko‘rsatkich 10 700 kilogrammni tashkil qilmoqda. Mahalla ahli 16—21-yanvar kunlari o‘z maishiy gaz ballonlarini “aylanma” usul orqali suyultirilgan gaz bilan to‘latilgan ballonlarga alishtirib olgan.
“Dog‘iston” MFYning 350 ta xonadoni 366 maishiy gaz balloni bilan ta’minlangan bo‘lib, ushbu mahallaga 8—9-yanvar kunlari 4600 kilogramm suyuq gaz keltirilgan. “Fayzobod” MFY iste’molchilari uchun “Baliqchitumangaz” filiali tomonidan 11—14-yanvar kunlari 5 600 kilogramm suyultirilgan gaz 315 ta xonadonga yetkazilgan. “Yuz chinor” MFYda ham 4400 kilogramm gaz yanvar oyining 15—17-sanalarida maxsus avtotransport vositalarida tarqatilgan. 362 ta xonadonning barchasi to‘la suyultirilgan gaz bilan ta’minlangan.
“Hududgaz Andijon” MChJ “Dog‘iston”, “Fayzobod”, “A’lam” va “Yuzchinor” MFYlarini hozirda tabiiy gaz bilan ta’minlay olmasligi, aholining suyultirilgan gaz bilan o‘z vaqtida ta’minlanishi nazoratga olinishini ma’lum qilgan.
Izoh (0)