2019-yil Qashqadaryo viloyatida 261 nafar ayol jinoyatga qo‘l urgan. 67 nafar xotin-qiz o‘z joniga qasd qilishga uringan. Bu haqda “Qashqadaryo” gazetasining rasmiy sayti ma’lum qildi.
Nashrning yozishicha, o‘tgan yili viloyatda o‘z joniga qasd qiluvchilar soni 166 nafarni tashkil etgan bo‘lsa, shundan 67 nafari xotin-qizlar, 29 nafari esa voyaga yetmaganlar bo‘lgan.
— 2019-yil viloyatdagi mavjud mahallalarning 48 tasida jinoyat sodir etilmagan. 178 ta mahallada esa jinoyatlar soni oshgan. Viloyat bo‘yicha 417 ta mahallada notinch oila ro‘yxatga olinmagan bo‘lsa-da, 301 mahallada ular soni ortgan. Oilaviy ajrimlar soni 1507 tani tashkil etgan, — deyiladi viloyat nashridagi maqolada.
Nashr sarhisobiga ko‘ra, viloyatdagi har bir mahallada mahalla raisi, xotin-qizlar masalalari bo‘yicha mutaxassis, profilaktika inspektori va uning yordamchilari, mahalla mas’ul kotibi, jamoatchilik asosida faoliyat yurituvchi 8 ta komissiya a’zolari, nuroniylar va yoshlar bo‘yicha o‘rinbosarlarni qo‘shib hisoblaganda 100 ga yaqin ishchi shu ishga mas’ul.
Ma’lumot berilishicha, ayni kunda viloyatda 768 ta mahalla fuqarolar yig‘ini faoliyat ko‘rsatadi.
Izoh (0)