Андижонда вилоят ҳокими «бир келиб-кетиши» сўралган маҳаллаларни табиий газ билан таъминлашнинг имкони йўқлиги маълум қилинди

Ижтимоий тармоқларда «Суткасига 3 соат ухлайдиган ҳокимга илтимос: бир соатгина вақт ажратиб, Балиқчига ҳам келиб кетинг!» сарлавҳали хабар тарқалди. Бу ҳақда Андижон вилояти ҳокимлиги ахборот хизмати маълум қилди.

Ушбу хабарда Балиқчи туманидаги «Доғистон», «Файзобод», «Аълам» ва «Юзчинор» МФЙларидаги бир қатор муаммолар, хусусан, табиий газ таъминоти йўқлиги юзасидан эътироз баён этилган.

Мазкур хабар юзасидан «Ҳудудгаз Андижон» МЧЖ қуйидагиларни маълум қилди:

Балиқчи туманидаги юқорида номи зикр этилган маҳаллалар табиий газ таъминоти етиб бориши қийин бўлган ҳудудда жойлашганлиги сабабли 2013 йилдан туман ҳокимининг тегишли фармойишига асосан суюлтирилган газ таъминотига ўтказилган. Барча МФЙлар истеъмолчилари бугунги кунда МЧЖнинг «Балиқчитумангаз» филиали томонидан суюлтирилган газ билан таъминлаб келинмоқда ва таъминланиш даврийлиги ўртача 40—45 кунни ташкил этади.

Туманнинг «Аълам» МФЙ ўрамидаги 7 та кўчада истиқомат қилувчи 611 та аҳоли хонадонида жами 660 дона маиший газ баллони мавжуд. Январь ойида мазкур МФЙ истеъмолчиларига режага кўра 7900 килограмм суюлтирилган газ етказиб берилиши керак бўлса, амалда бу кўрсаткич 10 700 килограммни ташкил қилмоқда. Маҳалла аҳли 16—21 январь кунлари ўз маиший газ баллонларини «айланма» усул орқали суюлтирилган газ билан тўлатилган баллонларга алиштириб олган.

«Доғистон» МФЙнинг 350 та хонадони 366 маиший газ баллони билан таъминланган бўлиб, ушбу маҳаллага 8—9 январь кунлари 4600 килограмм суюқ газ келтирилган. «Файзобод» МФЙ истеъмолчилари учун «Балиқчитумангаз» филиали томонидан 11—14 январь кунлари 5 600 килограмм суюлтирилган газ 315 та хонадонга етказилган. «Юз чинор» МФЙда ҳам 4400 килограмм газ январь ойининг 15—17-саналарида махсус автотранспорт воситаларида тарқатилган. 362 та хонадоннинг барчаси тўла суюлтирилган газ билан таъминланган.

«Ҳудудгаз Андижон» МЧЖ «Доғистон», «Файзобод», «Аълам» ва «Юзчинор» МФЙларини ҳозирда табиий газ билан таъминлай олмаслиги, аҳолининг суюлтирилган газ билан ўз вақтида таъминланиши назоратга олинишини маълум қилган.