Qozog‘istonning Sariog‘och shahar hokimiyatida “Yo‘lovchi tashish transporti” AJ va “O‘ztemiryo‘lyo‘lovchi” AJ hamda O‘zbekiston va Qozog‘istonning bir qator davlat idoralari vakillari ishtirokida ishchi guruh yig‘ilishi bo‘lib o‘tdi. Bu haqda “O‘zbekiston temir yo‘llari” AJ axborot xizmati ma’lum qildi.
Uchrashuvda O‘zbekiston va Qozog‘iston o‘rtasida ikki tomonlama hamkorlik bo‘yicha hukumatlararo komissiyasining 18-qo‘shma yig‘ilishi bayonnomasida belgilab berilgan ayrim vazifalar ijrosi xususida so‘z yuritildi.
So‘nggi paytlarda ommaviy axborot vositalari hamda ijtimoiy tarmoqlarda temir yo‘l transportidan foydalanishda, ayniqsa, davlatlar o‘rtasidagi chegara o‘tish punktlarida hamda yo‘l davomida migratsiya, chegara, bojxona xizmatlari, ichki ishlar kabi qator davlat organlari tomonidan o‘tkaziladigan tekshiruvlar, poyezdlarning davlat chegara o‘tish punktlarida uzoq muddat ushlab qolinishi kabi yo‘lovchilarning e’tirozlariga sabab bo‘layotgan turli xil ma’lumotlar tarqaldi. Bundan tashqari, yo‘lovchilar tomonidan tegishli tashkilotlarga bir qancha shikoyat va murojaatlar ham kelib tushmoqda.
O‘tkazilgan ishchi guruhining yig‘ilishda ushbu masalalarga alohida e’tibor qaratildi. “O‘zbekiston temir yo‘llari” AJga qarashli yo‘lovchi poyezdlarining Qozog‘iston hududidan hamda Qozog‘istonning “Yo‘lovchi tashish transporti” AJga qarashli yo‘lovchi poyezdlarining O‘zbekiston hududidan o‘tishida har ikkala davlat migratsiya, bojxona, chegara xizmati, ichki ishlar organlari vakillari ishtirokida qo‘shma monitoring o‘tkazish borasida kelishib olindi.
Shuningdek, yig‘ilishda davlat chegara stansiyalarida bojxona, chegara xizmatlari nazorati jarayonlarini tezlashtirish, migratsiya, ichki ishlar organlari kabi tashkilotlar tomonidan yo‘l davomida yo‘lovchilarning hujjatlarini tekshirish kabi holatlarni kamaytirish, yo‘lovchilarga davlat chegaralaridan o‘tishda nimalarga e’tibor qaratishlari hamda zarur hujjatlar haqida ko‘proq ma’lumotlar berish, tushuntirish ishlarini yo‘lga qo‘yish hamda yo‘lovchilardan kelib tushayotgan murojaatlarni o‘z vaqtida o‘rganish, ularni tegishli davlat organlariga yuborib, kamchiliklarni o‘z vaqtida bartaraf qilish, shuningdek, sohaga oid boshqa bir qator masalalar muhokama qilindi.
Izoh (0)