Rossiya bosh vaziri Dmitriy Medvedev boshchiligdagi hukumat iste’foga chiqqanligi haqida xabar berilgan edi. Iste’fo Rossiya prezidenti Vladimir Putin 15-yanvar, chorshanba kuni mamlakat parlamentiga qilgan murojaatidan keyin berildi.
Forbes’ning yozishicha, Vladimir Putin milliy loyihalar amalga oshirilishi qoniqarsiz holatdaligi sababli Dmitriy Medvedev boshchiligidagi hukumatning ishidan norozi bo‘lgan.
Nashrning Rossiya Vazirlar mahkamasiga yaqin manbalaridan biriga tayanib xabar berishicha, 2019-yil oxirida Putin va Medvedev o‘zaro uchrashuvda loyihalarning borishini muhokama qilgan. Qayd etilishicha, Putinga hisobot berilganda milliy loyihalar va milliy maqsadlar umuman boshqa-boshqa maydonlarda bo‘lgani hamda birinchisi ikkinchisiga erishishga yordam bermasligi ma’lum bo‘lgan. Bu esa Putinda salbiy munosabat keltirib chiqargan.
Qayd etilishicha, Medvedevni iste’foga chiqarish qarorini shaxsan Putinning o‘zi qabul qilgan. Kreml saytida hukumat iste’fosi e’lon qilinishidan bir soat oldin Putin Medvedev bilan uchrashgani haqida xabar berilgan. Biroq bu uchrashuv tafsilotlari ma’lum qilinmagan.
Ma’lum bo‘lishicha, 2019-yilda milliy loyihalar konfiguratsiyasi Hisob palatasi rahbari Aleksey Kudrin tomonidan tanqid qilingan. Kudrin Putinga hisobotida milliy loyihalarda “hech narsa bir-biriga to‘g‘ri kelmasligi”ni, ular maqsadlarga erishishga imkon bermasligini aytgan. Shuningdek, milliy loyihalar ijrosining borishini parlament yuqori palatasi spikeri Valentina Matviyenko ham tanqid qilgan hamda ularning 15—35 foizgagina bajarilganini salbiy baholagan.
Medvedev 15-yanvar, chorshanba kuni Putin ishtirokidagi hukumat yig‘ilishida o‘z jamoasi bilan iste’foga ketishini e’lon qildi.
Rossiyaning yangi bosh vaziri etib Mixail Mishustin tayinlandi. Dmitriy Medvedev esa Rossiya Xavfsizlik kengashi raisi o‘rinbosari lavozimini egalladi.
Izoh (0)