Россия бош вазири Дмитрий Медведев бошчилигдаги ҳукумат истеъфога чиққанлиги ҳақида хабар берилган эди. Истеъфо Россия президенти Владимир Путин 15 январь, чоршанба куни мамлакат парламентига қилган мурожаатидан кейин берилди.
Forbes’нинг ёзишича, Владимир Путин миллий лойиҳалар амалга оширилиши қониқарсиз ҳолатдалиги сабабли Дмитрий Медведев бошчилигидаги ҳукуматнинг ишидан норози бўлган.
Нашрнинг Россия Вазирлар маҳкамасига яқин манбаларидан бирига таяниб хабар беришича, 2019 йил охирида Путин ва Медведев ўзаро учрашувда лойиҳаларнинг боришини муҳокама қилган. Қайд этилишича, Путинга ҳисобот берилганда миллий лойиҳалар ва миллий мақсадлар умуман бошқа-бошқа майдонларда бўлгани ҳамда биринчиси иккинчисига эришишга ёрдам бермаслиги маълум бўлган. Бу эса Путинда салбий муносабат келтириб чиқарган.
Қайд этилишича, Медведевни истеъфога чиқариш қарорини шахсан Путиннинг ўзи қабул қилган. Кремль сайтида ҳукумат истеъфоси эълон қилинишидан бир соат олдин Путин Медведев билан учрашгани ҳақида хабар берилган. Бироқ бу учрашув тафсилотлари маълум қилинмаган.
Маълум бўлишича, 2019 йилда миллий лойиҳалар конфигурацияси Ҳисоб палатаси раҳбари Алексей Кудрин томонидан танқид қилинган. Кудрин Путинга ҳисоботида миллий лойиҳаларда «ҳеч нарса бир-бирига тўғри келмаслиги»ни, улар мақсадларга эришишга имкон бермаслигини айтган. Шунингдек, миллий лойиҳалар ижросининг боришини парламент юқори палатаси спикери Валентина Матвиенко ҳам танқид қилган ҳамда уларнинг 15—35 фоизгагина бажарилганини салбий баҳолаган.
Медведев 15 январь, чоршанба куни Путин иштирокидаги ҳукумат йиғилишида ўз жамоаси билан истеъфога кетишини эълон қилди.
Россиянинг янги бош вазири этиб Михаил Мишустин тайинланди. Дмитрий Медведев эса Россия Хавфсизлик кенгаши раиси ўринбосари лавозимини эгаллади.
Изоҳ (0)