“Haydovchilar, migrantlar, mardikorlarning hayotini qiyinlashtiradigan qonunlar — adolatli qonunlar emas”

O‘zbekistonning turli hududlaridan kelgan o‘nlab haydovchilar 13-yanvar kuni Oliy Majlis Qonunchilik palatasi binosi oldida norozilik bildirdi. Ular bojxona qonunchiligidagi o‘zgarishlardan noroziligini bildirgan.

Kecha yangi bojxona to‘lovlaridan norozi bo‘lib, bir guruh haydovchilar parlamentga shikoyat qilib kelgan. Davlat bojxona qo‘mitasi esa bu borada bayonot berib, o‘sha eski gaplarini takrorlagan: “O‘zi bunaqa, o‘zi unaqa”. Oxirida “Davlat bojxona qo‘mitasi bojxona organlari faoliyatiga doir xolis va xaqqoniy xabarlarni e’lon qilishda ommaviy axborot vositalari, keng jamoatchilik vakillari bilan o‘zaro hamkorlikka tayyor ekanligini ma’lum qiladi”, deb ham qo‘yishibdi. Gap bu yerda nimanidir noxolis yoritish haqida ketayaptimi?

Qachon bojxona talabidan norozi bo‘lib, odamlar Toshkentgacha kelgan? Bunaqa holat kamdan-kam bo‘lgan yoki umuman bo‘lmagan. Norozi bo‘lganlar kimlar? Biror tadbirkormi? Boymi? Yo‘q — oddiy haydovchilar. Rossiyada ter to‘kib ishlayotgan vatandoshlarimizning, rostini aytadigan bo‘lsak, O‘zbekiston eng yirik va to‘g‘ridan-to‘g‘ri investorlarining koriga yarayotgan, ular bir ikki-so‘m orttirib, uyiga jo‘natayotgan zarur buyumlarni olib kelayotgan odamlar. Xo‘sh, shularning hisobidan davlat qancha pul to‘plamoqchi? Yoki qaysi monopolistning cho‘ntagi qancha qappayishiga erishmoqchi?

Agar odamlar shuncha norozi bo‘lar ekan, unda bojxonachilar og‘zini to‘ldirib aytayotganidek, “mavjud bir nechta to‘lovlarni” birxillashtirishdan nima naf? “Odamlar qonunchilikdagi yangiliklarni noto‘g‘ri tushunmoqda, aslida unaqa emas, ularning huquqiy madaniyati past”, deyish — bu adolat emas. Sovuqda qaltirib, yurak hovuchlab o‘tirgan odam uchun bu adolatli talab emas.

“O‘tgan epoxa... qo‘shni davlatlardan 10 dollardan ortiq tovar olib kirishni taqiqlovchi sharmandali ‘10 dollar qonuni’ bilan tarixga kirgandi... Agar irodali qaror bilan xatolar tan olinmasa,.. millionlab o‘zbekistonliklarni xo‘rlovchi ‘uch dollar qonuni’ bilan xotiralarda qoladi”, degan savollar paydo bo‘layapti.

Davlat ikkita ish o‘rnini eplab yarata olmayotgan bir paytda, hukumatga, no‘noq hokimlarga qarab qolmay, o‘z kunini ko‘rib yurgan odamlar — haydovchilar, migrantlar, mardikorlar hayotini qiyinlashtiradigan qonunlar — adolatli qonunlar emas. Bu — sinizm (surbetlik). Bu — o‘zidan tushovi qimmat siyosat.

Bularning barchasi hissiyotda yozilgan fikrlar, xolos.

@davletovuz