Ўзбекистоннинг турли ҳудудларидан келган ўнлаб ҳайдовчилар 13 январь куни Олий Мажлис Қонунчилик палатаси биноси олдида норозилик билдирди. Улар божхона қонунчилигидаги ўзгаришлардан норозилигини билдирган.
Telegram’даги @davletovuz канали ушбу ҳолат юзасидан муносабат эълон қилди.
Кеча янги божхона тўловларидан норози бўлиб, бир гуруҳ ҳайдовчилар парламентга шикоят қилиб келган. Давлат божхона қўмитаси эса бу борада баёнот бериб, ўша эски гапларини такрорлаган: «Ўзи бунақа, ўзи унақа». Охирида «Давлат божхона қўмитаси божхона органлари фаолиятига доир холис ва хаққоний хабарларни эълон қилишда оммавий ахборот воситалари, кенг жамоатчилик вакиллари билан ўзаро ҳамкорликка тайёр эканлигини маълум қилади», деб ҳам қўйишибди. Гап бу ерда ниманидир нохолис ёритиш ҳақида кетаяптими?
Фото: «Kun.uz»
Қачон божхона талабидан норози бўлиб, одамлар Тошкентгача келган? Бунақа ҳолат камдан-кам бўлган ёки умуман бўлмаган. Норози бўлганлар кимлар? Бирор тадбиркорми? Бойми? Йўқ — оддий ҳайдовчилар. Россияда тер тўкиб ишлаётган ватандошларимизнинг, ростини айтадиган бўлсак, Ўзбекистон энг йирик ва тўғридан-тўғри инвесторларининг корига яраётган, улар бир икки-сўм орттириб, уйига жўнатаётган зарур буюмларни олиб келаётган одамлар. Хўш, шуларнинг ҳисобидан давлат қанча пул тўпламоқчи? Ёки қайси монополистнинг чўнтаги қанча қаппайишига эришмоқчи?
Агар одамлар шунча норози бўлар экан, унда божхоначилар оғзини тўлдириб айтаётганидек, «мавжуд бир нечта тўловларни» бирхиллаштиришдан нима наф? «Одамлар қонунчиликдаги янгиликларни нотўғри тушунмоқда, аслида унақа эмас, уларнинг ҳуқуқий маданияти паст», дейиш — бу адолат эмас. Совуқда қалтириб, юрак ҳовучлаб ўтирган одам учун бу адолатли талаб эмас.
«Ўтган эпоха... қўшни давлатлардан 10 доллардан ортиқ товар олиб киришни тақиқловчи шармандали ‘10 доллар қонуни’ билан тарихга кирганди... Агар иродали қарор билан хатолар тан олинмаса,.. миллионлаб ўзбекистонликларни хўрловчи ‘уч доллар қонуни’ билан хотираларда қолади», деган саволлар пайдо бўлаяпти.
Давлат иккита иш ўрнини эплаб ярата олмаётган бир пайтда, ҳукуматга, нўноқ ҳокимларга қараб қолмай, ўз кунини кўриб юрган одамлар — ҳайдовчилар, мигрантлар, мардикорлар ҳаётини қийинлаштирадиган қонунлар — адолатли қонунлар эмас. Бу — синизм (сурбетлик). Бу — ўзидан тушови қиммат сиёсат.
Изоҳ (0)