Fanlar Akademiyasi Qoraqalpog‘iston bo‘limi Qoraqalpoq tabiiy fanlar ilmiy-tadqiqot instituti olimlari Qoraqalpog‘istonda qushlarning 137 ta yangi turini aniqladi. Bu haqda O‘zA xabar bermoqda.
Biologiya fanlari doktori Sveta Mambetullayevaning ta’kidlashicha, Orolbo‘yi mintaqasida avval uchramagan “begunok”, “sharq klushasi” (vostochnaya klusha), uzun dumli chittak (dlinnaxvostaya sinitsa), kichik baliqchi qush (malaya chayka), katta chittak (bolshaya sinitsa), kichik chipor qizilishton (maliy pyostriy dyatel), kulrang kaklik (seraya kuropatka), snegir kabi yangi qush turlari paydo bo‘lgan.
Keyingi paytlarda Qoraqalpog‘iston hududidagi ko‘llarga flamingo qushlari ko‘payish uchun ham kela boshladi. Jumladan, Mo‘ynoq qo‘ltig‘idagi ko‘llar tizimi bo‘lgan Sudoche, Sariqamish, Jaltirbas, Shegeko‘l kabi ko‘llar flamingolarning ko‘payishi uchun nihoyatda qulay joylar hisoblanadi.
Hozirgi vaqtda Qoraqalpog‘iston hududida hisobga olingan 40 ta qush turi O‘zbekiston Respublikasining “Qizil kitobi”ga kiritilgan.
Ta’kidlanishicha, yaqin vaqtlarda Qoraqalpog‘iston hududida 885 ming gektar maydonga ega bo‘lgan yangi 4 ta — Sudoche ko‘li tizimi (84,7 ming gektar), Aqpetkey (58,8 ming gektar), Beltau (188,3 ming gektar), Mejdureche Aqdaryo — Qazaqdaryo (22,2 ming gektar) buyurtmaxonalari tashkil qilinishi bo‘yicha keng ko‘lamli ishlar olib borilmoqda. Ushbu buyurtmaxonalar bioxilma-xillikning yanada rivojlanishiga keng imkoniyat yaratadi.
Bundan 20 yillar avval Orol dengizining qurigan tubida 28 ming gektar maydonda ekilgan saksovulzorlar orasida hozirda hayvonot va qushlarning ko‘plab turlari paydo bo‘lgan.
Izoh (0)