Samarqandda yarim milliard so‘m mablag‘ni o‘zlashtirgan maktabgacha ta’lim mansabdorlariga jinoyat ishi qo‘zg‘atildi

Samarqandda maktabgacha ta’lim bo‘limi mansabdorlari bog‘cha jihozlari, gilam va matraslarni ataylab yuqori narxlarda xarid qilib, yarim millard so‘mdan ortiq budjet mablag‘larini o‘zlashtirgan. Bu haqda viloyat prokuraturasiga tayanib, “Daryo” muxbiri Farhod Norbo‘tayev ma’lum qilmoqda.

Samarqand viloyat prokuraturasining o‘ta og‘ir jinoyatlarni tergov qilish bo‘limi tomonidan olib borilgan dastlabki tergov hujjatlariga ko‘ra Paxtachi tuman MTB mansabdor shaxslari O‘zbekiston Respublikasining “Davlat xaridlari to‘g‘risida”gi qonunining 26-moddasi (Davlat xaridlari qiymatini baholashga taalluqli qoidalar) talablariga zid ravishda davlat xaridlari qiymatining bozor narxlariga muvofiqligini baholash uchun ochiq axborot manbalaridan foydalanmay kelgan.

Mansabdorlar tumandagi bog‘chalarga mebel jihozlari, gilam va matraslar xarid qilish bahonasida bozor narxidan 518 million 823 ming 478 so‘m qimmat jihozlarni sotib olgan.

Aniqlanishicha, MTB mansabdor shaxslari “Grant Samarkand Invest” MChJ tomonidan taqdim etilgan narxdan kelib chiqib, tovar xomashyosi birjadagi narxlarga nisbatan qimmat narxlarda “dxarid.uzex.uz” saytiga e’lonlar joylashtirgan. Natijada olingan xarid takliflariga asosan yopiq shaklidagi tanlov bayonnomasini rasmiylashtirib, ushbu bayonnomalar orqali “Gold Brend Mebel” MChJ bilan 2018-yil 17-dekabrda 564 million 276 ming so‘mlik 214-sonli hamda “Cotton Class Tex” MChJ bilan 2019-yil 27-may kuni 627 million 239 ming so‘mlik shartnomalar rasmiylashtirgan. Hadicha Sulaymonova nomidagi Respublika sud ekspertizasi markazi Samarqand viloyat bo‘limining 2019-yil 16-avgustdagi xulosasiga ko‘ra maktabgacha ta’lim tashkilotlariga “Gold Brend Mebel” va “Cotton Class Tex” mas’uliyati cheklangan jamiyatlari tomonidan yetkazib berilgan mebel jihozlari, gilam va matraslar bozor bahosiga nisbatan 518 million 823 ming 478 so‘mga qimmat narxda xarid qilinganligi aniqlangan.

Holat yuzasidan maktabgacha ta’lim bo‘limi mansabdor shaxslari va boshqalarga nisbatan Jinoyat kodeksining 167-moddasi (O‘zlashtirish yoki rastrata yo‘li bilan talon-toroj qilish) 3-qismi “a” bandi bilan jinoyat ishi qo‘zg‘atilgan.