Фанлар Академияси Қорақалпоғистон бўлими Қорақалпоқ табиий фанлар илмий-тадқиқот институти олимлари Қорақалпоғистонда қушларнинг 137 та янги турини аниқлади. Бу ҳақда ЎзА хабар бермоқда.
Биология фанлари доктори Света Мамбетуллаеванинг таъкидлашича, Оролбўйи минтақасида аввал учрамаган «бегунок», «шарқ клушаси» (восточная клуша), узун думли читтак (длиннахвостая синица), кичик балиқчи қуш (малая чайка), катта читтак (болшая синица), кичик чипор қизилиштон (малий пёстрий дятел), кулранг каклик (серая куропатка), снегир каби янги қуш турлари пайдо бўлган.
Кейинги пайтларда Қорақалпоғистон ҳудудидаги кўлларга фламинго қушлари кўпайиш учун ҳам кела бошлади. Жумладан, Мўйноқ қўлтиғидаги кўллар тизими бўлган Судоче, Сариқамиш, Жалтирбас, Шегекўл каби кўллар фламинголарнинг кўпайиши учун ниҳоятда қулай жойлар ҳисобланади.
Ҳозирги вақтда Қорақалпоғистон ҳудудида ҳисобга олинган 40 та қуш тури Ўзбекистон Республикасининг «Қизил китоби»га киритилган.
Таъкидланишича, яқин вақтларда Қорақалпоғистон ҳудудида 885 минг гектар майдонга эга бўлган янги 4 та — Судоче кўли тизими (84,7 минг гектар), Ақпеткей (58,8 минг гектар), Белтау (188,3 минг гектар), Междурече Ақдарё — Қазақдарё (22,2 минг гектар) буюртмахоналари ташкил қилиниши бўйича кенг кўламли ишлар олиб борилмоқда. Ушбу буюртмахоналар биохилма-хилликнинг янада ривожланишига кенг имконият яратади.
Бундан 20 йиллар аввал Орол денгизининг қуриган тубида 28 минг гектар майдонда экилган саксовулзорлар орасида ҳозирда ҳайвонот ва қушларнинг кўплаб турлари пайдо бўлган.
Изоҳ (0)