Asia Alliance Bank’ning nazorat paketini Yaponiyaning “Sawada Holdings” kompaniyasiga sotish uchun tayyorgarlik ko‘rilmoqda, deb xabar beradi Spot.
Buni O‘zbekiston Prezidenti Shavkat Mirziyoyevning 17—20-dekabr kunlari Yaponiyaga rasmiy tashrifidan so‘ng, amalga oshirish imkoniyati tug‘ildi. Tashrif yakunlariga ko‘ra bir qator kelishuvlar imzolangan, shuningdek, investitsiya loyihalari rejasi ishlab chiqarilgan edi.
Bu borada Prezident tomonidan 48 ta loyiha tasdiqlangan. Ulardan biri Asia Alliance Bank’ning nazorat paketini “Sawada Holdings” kompaniyasiga sotish.
Bitim 32 million dollarga baholangan. Hujjatlarni tayyorlash aprel oyiga mo‘ljallangan bo‘lsa, paket may oyida sotiladi. Bunga Davlat aktivlarini boshqarish agentligi rahbari Sunnatillo Bekenov mas’ul etib belgilangan.
Asia Alliance Bank’I 2009-yilda tashkil etilgan bo‘lib, 2018-yili davlat bankiga aylantirilgan.
2019-yilning aprelida bankning 25 foizini xorij investorlariga sotish tasdiqlangan edi. Yana 10 foizini IPO orqali sotish rejalashtirilmoqda.
“Sawada Holdings” CO., Ltd. — 1958-yilda asos solingan moliyaviy korporatsiya. Qimmatli qog‘ozlar bozorida ishlaydi, bank va boshqa shu turdagi faoliyatlar bilan shug‘ullanadi. Kompaniya “Kirgizkommersbank”ning 52,9 foiziga ham egalik qiladi.
Izoh (0)