Qashqadaryoda Yangi yil archasidagi yong‘in nima sababdan kelib chiqqani ma’lum bo‘ldi

Qashqadaryoning G‘uzor tumanida Yangi yil archasi yonib ketishi tafsilotolari ma’lum qilindi, deb xabar bermoqda “Novosti Kashqadari”.

G‘uzor tumani hokimligi matbuot kotibi Xudoyberdi Yo‘ldoshevning aytishicha, hodisa 3-yanvar kuni soat 17:30 larda “Sho‘rtan” futbol klubi stadioni oldida sodir bo‘lgan. Shu kuni hududda kuchli  yog‘ingarchilik kuzatilgan. Yoritish simlaridan suv o‘tgan va archaning bosh bezagi — yulduzda qisqa tutashuv yuz berib, yong‘in chiqqan.

“Tuman hokimligi qoshidagi obodonlashtirish bo‘limi xodimlari zudlik bilan harakat qilib, yong‘inni o‘chirish bo‘yicha tegishli choralar ko‘rdi. Daraxtning pastki qismida o‘rnatilgan avtomatik stabilizator elektr ta’minoti deyarli darhol to‘xtatildi. To‘g‘ri, yulduz butunlay yonib ketishiga bir necha daqiqa kifoya qildi. Umuman olganda, archaga ziyon yetmadi”, — deb ta’kidlagan Xudoyberdi Yo‘ldoshev.

Eslatib o‘tamiz, 2018-yilda Toshkentning “Lokomotiv” bog‘ida Yangi yil archasini o‘rnatish chog‘ida yong‘in yuz bergan va archaning uchdan bir qismi yonib ketgan edi. 2019-yilda esa Surxondaryoning Denov tumanida va Qo‘qon shahri markazidagi bayram archasi yongan.

Avvalroq Samarqandda kuchli shamol oqibatida bayram archasi qulagani videosi e’lon qilingan edi.