Buyuk Britaniya Eronga “Tomagavk” raketalari bilan zarba berishga tayyorlanmoqda

Buyuk Britaniya Eron islom inqilobi muhofizlari korpusi generali Qosim Sulaymoniyning o‘ldirilishi tufayli Yaqin Sharq mintaqasida Tehron hamda Vashington o‘rtasidagi keskinlik oshishda davom etsa va urush boshlansa, Eronga havodan zarba yo‘llashga tayyorlanmoqda. Bu haqda The Sun xabar berdi.

Nashrning yozishicha, London birinchi bo‘lib zarba bermoqchi emas, lekin konflikt chuqurlashishda davom etsa, ittifoqdoshi bo‘lgan Amerikani qo‘llab-quvvatlashga tayyor. Bunda suvosti floti – “Estyut” sinfidagi kemalar, “Tomagavk” qanotli raketalari ishga tushadi. Shunday raketalar bilan qurollangan suvosti kemalaridan biri Eronga yaqin hududda bo‘lib turibdi, deya qayd etgan nashr manbasi.

The Sun’ning yozishicha, Sulaymoniy halok bo‘lgan Iroqqa ham qutqaruv operatsiyalari uchun maxsus harbiy bo‘linmalarning oliy toifali jangchilari tashlangan. Mamlakatda iroqlik kuchishlatar tizim vakillariga o‘quvlar tashkil etgan 400 nafar britaniyalik harbiyga ham diplomatlar va boshqa yuqori lavozimdagi inglizlarni himoya qilish buyurilgan.

Bundan tashqari Londondagilar Yaqin Sharqda urush boshlanadigan bo‘lsa, Iroqdagi harbiylarga eng yangi va kuchli og‘ir artilleriya qurollari yuborilishini ko‘zda tutgan. Bosh vazir Boris Jonson 12 kunlik ta’tilidan qaytishi bilan unga ushbu taklif kiritiladi.

AQSh hamda Eron o‘rtasidagi bu kabi tahdidlar almashinuvi 3-yanvar, juma kuni Eron islom inqilobi muhofizlari korpusining obro‘li “Al-Quds” maxsus bo‘linmasi generali Qosim Sulaymoniyning Amerika Bag‘dod aeroportiga bergan havo zarbasi oqibatida o‘ldirilishi tufayli yanada keskinlashdi. Zarba yuzasidan buyruq shaxsan Tramp tomonidan berilgan. AQSh prezidenti Donald Trampning agar Eron Amerikaning baza yoki harbiylariga hujum qilsa eng yangi qurol bilan bunga javob qaytarishi haqida bayonot bergan. Eron qurolli kuchlari qo‘mondoni Abdulrahim Musaviy ushbu bayonotda aytilgan fikrlarga ishonmasligini bildirgan.