Qashqadaryo hokimi Zoir Mirzayev viloyatda paxta hosildorligida yuqori natijaga erishgan fermerga Spark avtomobili sovg‘a qildi. Bu haqda “Daryo” muxbiri xabar berdi.
Ma’lum bo‘lishicha, 29 dekabr, yakshanba kuni viloyatda faoliyat yurituvchi fermerlar uchun Yangi yil dasturxoni tashkil etilib, samimiy suhbat qurilgan.
Tadbirda shuningdek, viloyatda faoliyat yurituvchi fermerlar orasida yuqori hosildorlikka erishgan 26 nafar fermerga qariyb yarim milliard so‘m pul mukofoti ham topshirilgan.
— Qarshi tumani hududida paxtachilik bo‘yicha klaster — Sulton tex group korxonasi tumanda faoliyat yuritayotgan fermer xo‘jaliklariga bayram tadbiri tashkil etib, ularni 432 million so‘m pul mukofoti bilan taqdirladi, — deydi Qarshi tuman hokimligi axborot xizmati rahbari Ali Ergashev. — Mazkur korxona joriy yil ip yigiruv, trikotaj mato ishlab chiqarish, tayyor kiyim-kechak ishlab chiqarish fabrikalari hamda paxta tozalash, yog‘ ishlab chiqarish loyihalarini amalga oshirdi. Mazkur loyihalar evaziga viloyatda 1000 ta yangi ish o‘rni yaratildi.
Aytilishicha, Spark avtomobili Qarshi tumanida paxta hosili bo‘yicha eng yuqori hosildorlikka erishgan “Ochiloy Zohirova” fermer xo‘jaligiga berilgan.
Izoh (0)