O‘zbekiston Prezidenti Shavkat Mirziyoyev 27-dekabr, juma kuni Muhammad al-Xorazmiy nomidagi maktabda yoshlar bilan o‘tkazilgan uchrashuv davomida yosh oilalarning erta ajralishi holatlarining ko‘payganidan xavotirda ekanligini ma’lum qilgan. Bu haqda “Gazeta.uz” xabar berdi.
2019-yilning 11 oyi davomida 277,4 mingta nikoh qayd etilib, ajralishlar soni 28,7 mingni tashkil etgan. Prezident bu boradagi vaziyat juda achinarli ekanini qayd etgan.
“Uch yil davomida institutsional muammolarni hal etishga qaratilgan juda ko‘p hujjatlar ishlab chiqildi va tasdiqlandi, ammo ajralishlar sonining o‘sish darajasi yildan yilga ortib bormoqda”, — deya ta’kidlagan Shavkat Mirziyoyev.
“Ajralishlarning soni o‘sishda davom etmoqda. Hamma jim… Xotin-qizlar qo‘mitasi, “Oila” markazi, “Mahalla” fondi o‘z ishini a’lo darajada amalga oshirayotgandek, ammo… saylovlar, saylovoldi uchrashuvlarda ham bu masala ko‘tarilmadi. Nima bu hech kimga taalluqli emasmi?” — degan Prezident.
Davlat rahbari Xotin-qizlar qo‘mitasi, Vazirlar mahkamasi qoshidagi “Oila” markazi, “Nuroniy” fondi, Fuqarolarning o‘z-o‘zini boshqarish organlari faoliyatini muvofiqlashtirish respublika kengashi va boshqa mas’ul idoralar ajralishlar sonini kamaytirish borasida tegishli harakatlarni amalga oshirmayotganini tanqid qildi.
“Ushbu yo‘nalishda ilmiy asoslangan yechim va tavsiyalar yo‘q. Hech kim tashabbus ko‘rsatmaydi. Hokimlar paxta, g‘alla hosilining mo‘l bo‘lgani haqida xabar qiladi, endi ushbu yo‘nalishdagi ishlar bo‘yicha ham hisobot berishsin”, — degan Prezident.
Shavkat Mirziyoyev 2020-yilda “Yilning barchaga o‘rnak yosh oilasi” respublika tanlovini o‘tkazishni taklif qildi. Bundan tashqari, ushbu tashkilotlar maslahat kengashi tuzib, ajralish haqidagi sudda ko‘riladigan ishlardan oldin tashkillashtiriladigan yarashtiruv komissiyalaridan ko‘ra samara beradigan uslubda muammo bilan kurashishi rejalashtirilgan.
Davlat rahbari Xotin-qizlar qo‘mitasi, Vazirlar mahkamasi qoshidagi “Oila” markazi, “Mahalla” va “Nuroniy” fondlari rahbarlarini yarashtiruv komissiyalarining qoniqarsiz faoliyati yuzasidan takliflar bildirilmagani uchun tanqid qildi va “aravani torta olmagan”lar o‘rnini bo‘shatishi mumkinligini eslatdi.
Prezident avval yosh oilalarni uy-joy hamda ish bilan ta’minlash imkoniyati bo‘lmagani, lekin hozir bu borada vaziyat o‘zgarayotgani ajralish borasidagi ish sudda ko‘rib chiqilishi, oilaning buzilib ketishiga befarq bo‘lmagan jamiyat va fidoyi rahbarlar ko‘payishi kerakligini ta’kidladi.
Davlat statistika qo‘mitasi ma’lumotlariga ko‘ra, 2017-yilda nikohdan o‘tish va ajralishlar soni 306,2 mingga 31,9 mingni, 2018-yilda 311,3 mingga 32,3 mingtani tashkil etgan.
Izoh (0)