Қашқадарё ҳокими Зоир Мирзаев вилоятда пахта ҳосилдорлигида юқори натижага эришган фермерга Spark автомобили совға қилди. Бу ҳақда «Дарё» мухбири хабар берди.
Маълум бўлишича, 29 декабрь, якшанба куни вилоятда фаолият юритувчи фермерлар учун Янги йил дастурхони ташкил этилиб, самимий суҳбат қурилган.
Тадбирда шунингдек, вилоятда фаолият юритувчи фермерлар орасида юқори ҳосилдорликка эришган 26 нафар фермерга қарийб ярим миллиард сўм пул мукофоти ҳам топширилган.
— Қарши тумани ҳудудида пахтачилик бўйича кластер — Султон тех гроуп корхонаси туманда фаолият юритаётган фермер хўжаликларига байрам тадбири ташкил этиб, уларни 432 миллион сўм пул мукофоти билан тақдирлади, — дейди Қарши туман ҳокимлиги ахборот хизмати раҳбари Али Эргашев. — Мазкур корхона жорий йил ип йигирув, трикотаж мато ишлаб чиқариш, тайёр кийим-кечак ишлаб чиқариш фабрикалари ҳамда пахта тозалаш, ёғ ишлаб чиқариш лойиҳаларини амалга оширди. Мазкур лойиҳалар эвазига вилоятда 1000 та янги иш ўрни яратилди.
Айтилишича, Spark автомобили Қарши туманида пахта ҳосили бўйича энг юқори ҳосилдорликка эришган «Очилой Зоҳирова» фермер хўжалигига берилган.
Изоҳ (0)