26-dekabr, payshanba kuni O‘zbekiston Prezidenti Shavkat Mirziyoyev Toshkentda yangi qurilgan Abdulla Qodiriy nomidagi ijod maktabi va muzeyni borib ko‘rdi va u yerda yozuvchi va shoirlar, adabiyotshunos olimlar hamda yosh ijodkorlar bilan muloqot qildi.
Prezident muloqot davomida Oliy Majlisga bo‘ladigan murojaatnomasi haqida ham to‘xtalib o‘tdi.
“Parlamentga qiladigan murojaatimiz tayyor bo‘lgan. Yangi parlament saylanishi bilan, nasib bo‘lsa, yanvar oyi o‘rtalarida bu tadbirni ham o‘tkazamiz”, — deya Prezident so‘zlarini keltirmoqda “Kun.uz”.
An’ana bo‘yicha O‘zbekiston Prezidentining Oliy Majlisga qiladigan murojaatida yil nomi va Davlat dasturida ko‘zda tutiladigan ustuvor yo‘nalishlar ham taklif qilinadi.
Shavkat Mirziyoyev 2018-yil 28-dekabrida Parlamentga murojaatnoma yo‘llagan va o‘shanda 2019-yilga Faol investitsiyalar va ijtimoiy rivojlanish yili deb nom berilgandi. O‘zbekiston Prezidenti 2017-yildan beri Parlamentga murojaatnoma yo‘llab, kelgusi yilda amalga oshiriladigan islohotlar va davlat loyihalari borasidagi takliflarini berib kelmoqda. Ilk bor yo‘llangan murojaatnomadan keyin 2018-yil “Faol tadbirkorlik, innovatsion g‘oyalar va texnologiyalarni qo‘llab-quvvatlash yili” bo‘lgan.
Izoh (0)