Namangan viloyati hokimi Xayrullo Bozorov Namangan shahridagi “Shodiyona” majmuasida bo‘lib o‘tgan yil yakunlariga bag‘ishlangan bayram tadbirida sportchilar, madaniyat va san’at vakillari, jurnalist va blogerlarni taqdirladi. Bu haqda “Daryo” muxbiri Azizbek Abduvaliyev xabar bermoqda.
Viloyat sportchilari tomonidan joriy yil mobaynida mahalliy va xalqaro miqyosidagi musobaqalarda 1009 ta oltin, 951 ta kumush, 1512 ta bronza, jami 3472 ta medal qo‘lga kiritildi.
Namanganlik sportchilarning Tokio olimpiadasida muvaffaqiyatli ishtirokini ta’minlash — mutasaddilar o‘z oldiga qo‘ygan asosiy maqsadlardan biri. Ulardan 5 nafari ushbu Olimpiada litsenziyalarini qo‘lga kiritib ulgurdi. Hozirda yana 12 nafar sportchi yo‘llanmalar uchun kurashni davom ettirmoqda.
Tadbirda viloyatda jismoniy tarbiya va sportni ommalashtirishga hamda respublika va xalqaro miqyosdagi musobaqalarda erishgan yuqori natijalari uchun 50 nafardan ortiq sportchiga viloyat hokimining tashakkurnomasi hamda sovg‘alari topshirildi.
Jumladan, yunon-rum kurashi bo‘yicha jahon chempionati sovrindori, Tokio—2020 Olimpiadasi yo‘llanmasi sohibi Rustam Assakalovga Malibu avtomobili, murabbiyi Ravshan Ruzukovga Gentra avtomobili, karate WKF bo‘yicha Osiyo chempioni, Tokio—2020 yo‘llanmasi da’vogari Bahriniso Babayevaga Spark avtomobili sovg‘a qilindi.
Baydarka va kanoeda eshkak eshish bo‘yicha Osiyo chempionlari, Osiyo o‘yinlari g‘oliblari, jahon chempionati sovrindorlari Nilufar Zokirova va Dilnoza Rahmatovaga Namangan shahridan xonadon ajratish sertifikatlari topshirildi.
Alisher Navoiy nomidagi viloyat musiqali drama teatri jamoasi sentabr oyida Qirg‘izistonning O‘sh shahrida o‘tkazilgan “Art-Ordo” xalqaro teatr festivalida ishtirok etib qaytdi. Dekabr oyida esa Tojikistonning Xo‘jand viloyatida “Aziz” spektakli bilan ijodiy safarda bo‘ldi. Bu xorijiy safarlar Namangan madaniyat va san’atini keng targ‘ib qilishda o‘z hissasini qo‘shdi.
Yil davomida viloyatdagi 19 ta bolalar musiqa va san’at maktabidan jami 63 nafar o‘quvchi Respublika va xalqaro ko‘rik-tanlovlarda faxrli o‘rinlarni egalladi. 2019-yilda Rossiyaning Moskva, Sochi va Sankt-Peterburg shaharlari, Qirg‘izistonning Issiqko‘l, Belarusning Mogilyov shaharlarida o‘tkazilgan xalqaro musiqa va san’at tanlovlarida viloyatning yosh iste’dodlari katta yutuqlarga erishib, qator Gran-pri mukofotlari bilan qaytdi.
Viloyat madaniyati va san’atini yuksaltirish ishiga qo‘shgan munosib hissasi, samarali xizmatlari uchun 20 nafardan ortiq soha vakillariga tashakkurnoma hamda sovg‘alar topshirildi.
Xususan, Alisher Navoiy nomidagi viloyat musiqali drama teatriga moddiy-texnik bazasini kuchaytirish uchun 300 million so‘mlik sertifikat sovg‘a qilindi. O‘zbekiston san’at arbobi, viloyat musiqali drama teatri rejissyori Karimjon Yo‘ldoshevga esa Namangan shahridagi xonadon sertifikati taqdim etildi.
Respublika nashrlarining viloyat muxbirlari, viloyat bilan hamkorlik qilayotgan xorijiy va respublika axborot manbalari vakillari, viloyatdagi bosma va internet nashrlar jamoalari, ijtimoiy tarmoqlardagi yirik kanallar va guruhlar administratorlari ishtirokida o‘tkazilgan tantanali marosimda matbuot va so‘z erkinligining ijtimoiy-iqtisodiy rivojlanishdagi ahamiyati alohida ta’kidlandi.
Aholiga xolis va haqqoniy axborot yetkazishga qo‘shgan munosib hissasi hamda viloyat ijtimoiy hayotidagi faol ishtiroki uchun bir guruh jurnalistlar, blogerlar va ijtimoiy tarmoq faollariga viloyat hokimining tashakkurnomasi hamda esdalik sovg‘asi — kompyuter jamlanmasi topshirildi. Taqdirlanganlar orasida “Daryo” nashrining viloyatdagi muxbiri ham bor.
Izoh (0)