Surxondaryo viloyati hokimi To‘ra Bobolovga O‘zbekiston Respublikasi mudofaa vazirining esdalik nishoni topshirildi, deb xabar berdi viloyat hokimligi matbuot xizmati.
Qayd etilishicha, esdalik nishoni Termiz shahridagi “Alpomish” kurash majmuasida bo‘lib o‘tgan Surxondaryo viloyati hokimi sovrini uchun Mudofaa vazirligining vohadagi harbiy xizmatchilari o‘rtasida “Amir Temur o‘g‘lonlari” va “Jaloliddin Manguberdi vorislari” nomidagi viloyat tanlovi g‘oliblarini tantanali taqdirlash marosimida topshirilgan.
Tadbirda Janubi-g‘arbiy maxsus harbiy okrugi qo‘shinlari qo‘mondoni, polkovnik Zaynobiddin Iminov O‘zbekiston Respublikasi mudofaa vazirining buyrug‘ini o‘qib eshittirdi.
“Surxondaryo viloyati harbiy-ma’muriy sektori doirasida Janubi-g‘arbiy maxsus harbiy okrugining Janubiy operatsion yo‘nalishida joylashgan harbiy qism va muassasalarining o‘quv-moddiy bazasini, harbiy shaharcha va poligonlarning infratuzilmasini takomillashtirishda, harbiy xizmatchilar uchun qulay sharoitlarni yaratishda hamda yosh avlodni vatanparvarlik ruhida tarbiyalashda amalga oshirgan ishlari va mamlakatimizning mudofaa qudratini yuksaltirishga qo‘shgan ulkan hissasi uchun Surxondaryo viloyati hokimi, harbiy-ma’muriy sektori rahbari To‘ra Bobolov Mudofaa vazirining esdalik nishoni bilan taqdirlandi”, — deyiladi xabarda.
Shuningdek, tadbirda Janubiy operatsion yo‘nalish boshqaruvi guruhi harbiy xizmatchilari o‘rtasida o‘tkazilgan “Amir Temur o‘g‘lonlari” va “Jaloliddin Manguberdi vorislari” nomidagi viloyat tanlovida 1, 2 va 3-o‘rinlarni qo‘lga kiritgan ishtirokchilar pul mukofotlari hamda diplom va qimmatbaho sovg‘alar bilan taqdirlandi. Tanlovda faol ishtirok etgan 52 nafar harbiy xizmatchi ham munosib rag‘batlantirildi.
Izoh (0)