O‘zbekistondan Chimkentga katta hajmda nolegal mahsulot kirib kelmoqda. Bu haqda Qozog‘istondagi mazkur shahar tadbirkorlar palatasi va mahalliy ishbilarmonlar ma’lum qildi, deya xabar beradi “Liter.kz”.
Chimkentdagi “Altin adam” fabrikasi ta’sischilari shaxsan o‘rganish o‘tkazib, O‘zbekistondan Qozog‘istonga kuniga qariyb 10 ming komplekt kostyum noqonuniy olib kirilishini aniqladi.
Mahsulotning bir qismi keyinchalik bu yerdan Rossiyaga yuboriladi. Bitta kostyumning o‘rtacha narxi 30 dollarga teng. Kostyumlarning nolegal olib kirilishi yillik aylanmasi 100 million dollardan oshiqni tashkil etishi mumkin.
Qozog‘iston davlat daromadlari qo‘mitasi rasmiy ma’lumotlariga ko‘ra esa 2018-yil davomida O‘zbekistondan Qozog‘istonga jami 1,86 million dollarlik 8,5 million dona erkak va ayollar kostyumi, shimi va yubkasi keltirilgan.
Taqqoslash uchun, yiliga 120 ming dona kostyum ishlab chiqarish quvvatiga ega “Altin adam” fabrikasida yillik sotuvlar hajmi 20 mingtadan oshmayapti.
Chimkent tadbirkorlar palatasi mutaxassislari nolegal tovar Qozog‘istonga qanday o‘tayotganini aniqlash uchun maxfiy mijoz rolini bajarishdi. Bu jarayonda yashirin import mamlakatga postlar oralab emas, chegarachilar va bojxonachilar ko‘z o‘ngida kirib kelishi ma’lum bo‘ldi.
Tovar chegaradan quyidagi sxema asosida o‘tib keladi: o‘zbek tomonida mashinalar yukini tushiradi, yuk tashuvchilar ularni telejkada chegaradan qo‘l yuki sifatida olib o‘tadi va Qozog‘iston hududida boshqa mashinaga yuklaydi. Shu tariqa chegaradan nafaqat tekstil, balki qurilish materiallari, quruq mevalar, xalq iste’moli mollari, konditer mahsulotlari olib o‘tiladi.
“Ko‘plab mahalliy tikuvchilik korxonalari raqobatga dosh berolmay, o‘z ishlarini O‘zbekistondagi korxonalarga autsorsingga berishga majbur bo‘lmoqda. Bu esa qo‘shni davlatda tikuvchilik bilan bog‘liq ishlab chiqarish keskin ko‘payishiga olib keldi. Birgina Namangan viloyatining o‘zida ularning soni 50 tadan 100 taga yetdi. Konditer mahsulotlari ishlab chiqarish sohasida ham xuddi shunday bo‘lmoqda”, — deydi Chimkent tadbirkorlar palatasi direktori Nurlan Kabitshayev.
Izoh (0)