Польша Ташқи ишлар вазирлиги Россия президенти Владимир Путиннинг Иккинчи жаҳон уруши бошланишига оид сўзларига «хавотир ва ишончсизлик билан» муносабат билдирди. Бу ҳақда Meduza хабар бермоқда.
Польша ТИВда таъкидланишича, Путиннинг сўзларида воқеалар нотўғри талқин қилинган. Вазирлик президентнинг сўзларини кейинчалик Иосиф Сталиннинг вориси Никита Хрушчев томонидан қораланган «Сталин тоталитаризми давридаги тарғибот хабарларига» ўхшатган.
«Россия президентининг сўзлари Польша ва Россия мутахассисларининг биргаликдаги фаолиятини, шунингдек, Польша—Россия муносабатларида ҳақиқат ва ярашиш йўлини топишга уринган ўзларидан олдинги Михаил Горбачёв ва Борис Ельциннинг ютуқларига путур етказади», — дейилади Польша ТИВ баёнотида.
Польшанинг расмий позицияси бу 1939 йил сентябрь ойида СССР Германия сингари Польшага ҳужум қилгани ҳақидаги тезис ҳисобланади. Владимир Путин 19 декабрь куни совет қўшинлари Польшага мамлакат расмийлари «Польша—Руминия» чегарасида бўлган пайтда кирган деб айтган. Шунингдек, Путин СССР Германия билан тажовуз қилмаслик тўғрисидаги битмни охирги бўлиб имзолагани ва Польша бундан аввал Чехословакияни бўлишда иштирок этганини айтган.
Хабарда айтилишича, Польша Владимир Путинни Иккинчи жаҳон уруши бошланганининг 80 йиллиги муносабати билан ўтказиладиган тадбирларга таклиф қилмади. Польша бош вазири ўринбосари Яцек Сасин бу ҳолатни Путинни «қўшни давлатларга қарши қуролли тажовуздан фойдаланадиган мамлакат етакчиси» деб қарагани билан изоҳлаган.
Изоҳ (0)