Braziliya prezidenti Jair Bolsonaru o‘z qarorgohi — Alvorad qasrida yiqilib tushganidan so‘ng mamlakat janubi-g‘arbidagi harbiy gospitalga yotqizildi, deb xabar berdi “RIA Novosti”.
“Norasmiy ma’lumotlarga ko‘ra prezident o‘z qarorgohidagi vannaxonada yiqilib tushgan”, — deyiladi xabarda.
Qayd etilishicha, prezident shifokorlar ko‘rigidan o‘tgan. Ular prezidentni kasalxonaga yotqizish haqida qaror qabul qilgan. Uning miyasi tomografiya tekshiruvidan o‘tkazilganida o‘zgarish qayd etilmagan, biroq Bolsanaru 6—12 soat davomida shifokorlar nazorati ostida bo‘ladi.
Braziliya prezidentiga hamrohlik qilayotgan xavfsizlik vaziri Augustu Xelenu “prezidentning ahvoli yaxshiligini, biroq u tunni shifoxonada o‘tkazishi”ni aytgan.
Braziliya prezidentining salomatligi 2018-yilda unga pichoq bilan hujum qilishganlaridan so‘ng aholida tashvish uyg‘otmoqda. Ushbu hujumdan so‘ng Bolsanaru to‘rt marta operatsiya qilingan edi.
Dekabr oyi boshida Braziliya prezidenti teri saratoniga chalinganlikda gumonlanib, tibbiy tekshiruvdan o‘tkazilgan edi. Tekshiruv natijasida Bolsanaruda saraton aniqlanmagan.
Izoh (0)