Shayx Abdulaziz Mansur: “Noto‘g‘ri tushunibsizlar — dinimizda Yangi yilni bayram qilish yo‘q!” (video)

Bir necha kun avval Islom sivilizatsiyasi markazi direktori o‘rinbosari shayx Abdulaziz Mansurning milodiy Yangi yil bayramini nishonlash masalasiga doir mulohazalari e’lon qilingan edi.

Bismillahir Rohmanir Rohiym. Alhamdulillah. Vassalatu-vassalamu a’la Rasulillah. Ammo ba’d.

Hurmatli aziz tinglovchilar! Assalomu alaykum va Rohmatullohi va barakotuh.

Kuni kecha milodiy yangi sana mavzusida efir orqali chiqish qilgan edim. Uni “Ziyo” studiyasi bir soat yozib olgan edi. Eshituvchilarga tushunarli bo‘lsin, deb men dalillar bilan manbalarini ko‘rsatib, mana shu islom dinimizni nuqtai nazaridan bu mavzuga qanday qaralganligi to‘g‘risida bir soat izoh bergan edim. Lekin, afsuski, ertasi kuni mana shu bir soatlik suhbat besh daqiqaga qisqartirilibdi, shu sabab gaplar tushunarli bo‘lmay qolibdi.

Shuning uchun xalqimiz orasida, aholimiz o‘rtasida turli tushunmovchilik va e’tirozlar paydo bo‘ldi. Go‘yoki: «Shayx Abdulaziz Mansur Yangi yilni kutishga ruxsat beribdi, bir-birlarini tabriklashga ruxsat beribdi, Yangi yilni oqlab fatvo beribdi», degan har xil shov-shuv gaplar tarqaldi. Bu gaplar menga yetib keldi. E’tirozlarning hammasidan xabarim bor. Shuning uchun, hozirgi chiqishimda mana shu e’tirozlarga o‘z munosabatimni bildirib, izoh bermoqchi edim.

Yangi yil, Yangi yilni kutish yoki bu bayram bilan tabriklash yoxud uni bayram qilish kabi amallar bizning muqaddas Islom dinimiz manbaalarida hech qayerda ko‘rsatilmagan. U yo‘q narsa. Manbalarda Yangi yilni, u qaysi Yangi yil bo‘lishidan qat’i nazar, hattoki hijriy yilni ham kutib olinsin, degan gap yo‘q. Shunday bo‘lganidan keyin men qanaqasiga dini Islom manbalarida, ahkomlarida, shariatimizda yo‘q narsani xalqqa targ‘ib qilaman?!

Men ustozlarni ko‘rgan, ularning tarbiyasini olgan ahli ilm odamiman. Men ko‘rmagan narsam bo‘lsa, aniqlamagan narsam bo‘lsa, manbalarini aniq bilmasam, ko‘nglim dilim taskin topmasa, u gaplarni gapirmayman. Tushunmovchilikni isloh qilib, tuzatib qo‘ymoqchimanki, Yangi yilni kutib olish yoki tabriklash — bu narsalar Islom dinimizda yo‘q. Bu odat dunyoviy odat bo‘lib kelayotgan narsa. Buni dinga hech qanday taalluqli joyi yo‘q.

Shu narsalarni eshitib, xalqimizga javob qilyapman, lekin bu narsalar kifoya qilmayapti. Shu sababli men xalqimizdan, eshituvchilardan iltimos qilamanki, bizni to‘g‘ri tushuninglar. Dinimizni qo‘ldan kelgancha o‘rganib, xalqimizga yetkazishni niyat qilganmiz. Mana shu olgan ilmlarimizni faqat Islom dini yo‘lida, xalqimizning e’tiqodi yo‘lida sarflashni niyat qilganmiz.

Shuning uchun Alloh subhanahu va taolo bunday tushunmovchiliklardan, zalolatdan o‘zi asrasin. Hidoyat uzra barchalarimizni sobit qadam qilsin. Vaassalamu alaykum va rahmatullohi taala va barakatuh.

Shayx Abdulaziz Mansur