Liberal demokratik partiyasi yetakchisi Aktam Hayitovning so‘zlariga ko‘ra, O‘zbekiston Oliy Majlisi o‘z tarixi mobaynida konstitutsion normalarga zid keluvchi qonunlar qabul qilmagan. Bu haqda Hayitov 20-dekabr kuni bo‘lib o‘tgan “Demokratik debat”da aytib o‘tdi, deb xabar beradi “Kun.uz”.
“Deputatlar Konstitutsiyaga va boshqa qonunlarga zid qonunlar qabul qilinishiga qarshi tura oladi. Men aniq bilaman, parlament tarixida hali Konstitutsiyamizga zid bo‘lgan qonunlar qabul qilinmagan. Hozir ham, bundan keyin ham qabul qilinmaydi”, – deb ta’kidladi O‘zLiDeP lideri.
Aktam Hayitovdan oldin so‘z olgan “Milliy tiklanish” partiyasi yetakchisi Alisher Qodirov 2019-yil aprelida “Fermer xo‘jaliklari to‘g‘risida”gi qonunga kiritilgan o‘zgarish boshqa bir qonunga zid bo‘lganiga e’tibor qaratgan.
“Qonunchilikda haqiqatan bir-biriga teskari tushirib qoladigan normalar uchrab turadi. Huquqshunoslarimiz yaxshi bilishadi, bunaqa holat bor. Ayniqsa, misol uchun, ‘Fermer xo‘jaliklari to‘g‘risida’gi qonun bilan ‘Nodavlat notijorat tashkilotlari to‘g‘risida’gi qonunlar bir-biriga zid kelib qolgani kabi. Xuddi shunga o‘xshash qonunlar qabul qilinmasligi uchun bu safar fraksiyamiz juda ham mustahkam ishlashiga va’da bera olamiz”, – deydi Qodirov.
Aktam Hayitov bunga javoban tilga olingan ikki qonun o‘rtasida yuridik kolliziya yo‘qligini ishonch bilan ta’kidladi.
“Alisher Qodirov ‘Fermer xo‘jaliklari to‘g‘risida’gi qonun bo‘yicha o‘z fikrlarini bildirib o‘tdilar. U yerda ham bir-biriga zid keladigan normalar yo‘q. Buni yuristlarimiz yaxshilab ko‘rib chiqishdi. Bizdagi yuristlarning saviyasi ham yetarli darajada. Ishoning, bundan keyin ham parlamentimiz qonun ijodkorligi borasida xalqimizga naf keltiradigan, bir-biriga zid bo‘lmagan va hayotiy qonunlarni qabul qiladi”, – deydi O‘zLiDeP yetakchisi.
Izoh (0)