Бир неча кун аввал Ислом цивилизацияси маркази директори ўринбосари шайх Абдулазиз Мансурнинг милодий Янги йил байрамини нишонлаш масаласига доир мулоҳазалари эълон қилинган эди.
Ушбу мулоҳазалар жамоатчилик ўртасида турли баҳс-мунозараларга сабаб бўлди. Шу боис шайх Абдулазиз Мансур унинг Янги йил байрами ҳақидаги мулоҳазаларига нисбатан бўлаётган эътирозларига муносабат билдирди:Бисмиллаҳир Роҳманир Роҳийм. Алҳамдулиллаҳ. Вассалату-вассаламу аъла Расулиллаҳ. Аммо баъд.Ҳурматли азиз тингловчилар! Ассалому алайкум ва Роҳматуллоҳи ва баракотуҳ.
Куни кеча милодий янги сана мавзусида эфир орқали чиқиш қилган эдим. Уни «Зиё» студияси бир соат ёзиб олган эди. Эшитувчиларга тушунарли бўлсин, деб мен далиллар билан манбаларини кўрсатиб, мана шу ислом динимизни нуқтаи назаридан бу мавзуга қандай қаралганлиги тўғрисида бир соат изоҳ берган эдим. Лекин, афсуски, эртаси куни мана шу бир соатлик суҳбат беш дақиқага қисқартирилибди, шу сабаб гаплар тушунарли бўлмай қолибди.
Шунинг учун халқимиз орасида, аҳолимиз ўртасида турли тушунмовчилик ва эътирозлар пайдо бўлди. Гўёки: «Шайх Абдулазиз Мансур Янги йилни кутишга рухсат берибди, бир-бирларини табриклашга рухсат берибди, Янги йилни оқлаб фатво берибди», деган ҳар хил шов-шув гаплар тарқалди. Бу гаплар менга етиб келди. Эътирозларнинг ҳаммасидан хабарим бор. Шунинг учун, ҳозирги чиқишимда мана шу эътирозларга ўз муносабатимни билдириб, изоҳ бермоқчи эдим.
Янги йил, Янги йилни кутиш ёки бу байрам билан табриклаш ёхуд уни байрам қилиш каби амаллар бизнинг муқаддас Ислом динимиз манбааларида ҳеч қаерда кўрсатилмаган. У йўқ нарса. Манбаларда Янги йилни, у қайси Янги йил бўлишидан қатъи назар, ҳаттоки ҳижрий йилни ҳам кутиб олинсин, деган гап йўқ. Шундай бўлганидан кейин мен қанақасига дини Ислом манбаларида, аҳкомларида, шариатимизда йўқ нарсани халққа тарғиб қиламан?!
Мен устозларни кўрган, уларнинг тарбиясини олган аҳли илм одамиман. Мен кўрмаган нарсам бўлса, аниқламаган нарсам бўлса, манбаларини аниқ билмасам, кўнглим дилим таскин топмаса, у гапларни гапирмайман. Тушунмовчиликни ислоҳ қилиб, тузатиб қўймоқчиманки, Янги йилни кутиб олиш ёки табриклаш — бу нарсалар Ислом динимизда йўқ. Бу одат дунёвий одат бўлиб келаётган нарса. Буни динга ҳеч қандай тааллуқли жойи йўқ.
Шу нарсаларни эшитиб, халқимизга жавоб қиляпман, лекин бу нарсалар кифоя қилмаяпти. Шу сабабли мен халқимиздан, эшитувчилардан илтимос қиламанки, бизни тўғри тушунинглар. Динимизни қўлдан келганча ўрганиб, халқимизга етказишни ният қилганмиз. Мана шу олган илмларимизни фақат Ислом дини йўлида, халқимизнинг эътиқоди йўлида сарфлашни ният қилганмиз.
Шунинг учун Аллоҳ субҳанаҳу ва таоло бундай тушунмовчиликлардан, залолатдан ўзи асрасин. Ҳидоят узра барчаларимизни собит қадам қилсин. Ваассаламу алайкум ва раҳматуллоҳи таала ва баракатуҳ.
Шайх Абдулазиз Мансур
Изоҳ (0)