AQSh aholisining 44 foizi Vakillar palatasi prezident Donald Trampga nisbatan e’lon qilgan impichmentni ma’qullamoqda. Reuters agentligi va Ipsos kompaniyasi tomonidan o‘tkazilgan so‘rov natijalari shundan dalolat berdi, deya ma’lum qiladi “Kommersant”.
So‘rov 18—19-dekabr kunlari butun AQSh hududi bo‘ylab o‘tkazildi. Unda 1108 kishi ishtirok etdi.
Vakillar palatasi Trampni mansabni suiiste’mol qilish va Kongress faoliyatiga to‘sqinlik qilishda aybladi. Birinchi ayblovga so‘ralganlarning 53, ikkinchisiga esa 51 foizi qo‘shilgan.
So‘rovda ishtirok etganlarning 42 foizi Kongress prezidentni lavozimdan chetlatishi, 17 foizi unga hayfsan e’lon qilinishini yoqlagan. 29 foiz respondentlar esa Trampdan barcha ayblovlarni olib tashlash kerakligini bildirgan.
Ma’lumot uchun, Vakillar palatasi qaroridan so‘ng impichment bo‘yicha ovoz berish yuqori palata — Senatda ham o‘tkaziladi, biroq hali sanasi aniq emas.
Izoh (0)