O‘zbekiston partiyalari Yunusobod metrosi qurilishidagi fojiasi yuzasidan obdon tekshiruv o‘tkazishni talab qildi

O‘zbekiston partiyalari 18-dekabr kuni Toshkent metropoliteni Yunusobod yo‘lining yangi qurilayotgan qismida yer o‘pirilishi oqibatida qurbon bo‘lganlarning oila a’zolari va yaqinlariga chuqur hamdardlik bildirdi. Ular, shuningdek, sodir bo‘lgan voqeani yaxshilab o‘rganish va aybdorlarni javobgarlikka tortishni talab qildi. Hozirda hodisa oqibatida olti kishi halok bo‘lganligi ma’lum.

“Ushbu falokatda yaqinlarini yo‘qotgan barcha vatandoshlarning iztirob va qayg‘ulariga sherikmiz, chin yurakdan hamdardlik bildiramiz”, — deyiladi O‘zLiDeP xabarida.

“Ushbu holat yuzasidan tashkil etilgan hukumat komissiyasi fojiaga olib kelgan sabablarni batafsil o‘rganishi va xolisona tekshirishiga umid qilamiz”, — deya ta’kidlangan xabarda.

XDP hukumatdan, mutasaddi vazirlik va idoralar, qurilish va pudratchi tashkilotlar rahbarlaridan “ishchi xodimlarning hayoti, qonuniy haq-huquqlarini muhofaza qilish bilan bog‘liq o‘ta dolzarb masalalarga katta mas’uliyat va chuqur javobgarlik hissi bilan yondashish”ni talab qildi.

“Bugun mamlakatimizning barcha hududlarida minglab qurilish loyihalari amalga oshirilmoqda. Achchiq haqiqatni tan olishimiz kerakki, ularning aksariyatida yuz minglab yurtdoshlarimiz, ayniqsa, yoshlar norasmiy yollanma ishchi sifatida haqsiz, huquqsiz mehnat qilmoqdalar”, — deyilgan XDP munosabatida.

Partiya, shuningdek, voqea “aybdorlari qonun oldida javob berishi shart”ligini ta’kidlagan.

“Adolat” SDP halok bo‘lganlarning ismlari va ularning mehnatlari odamlar yodida umrbod qolishini aytgan. Shuningdek, blogerlar tomonidan taklif etilayotgan metro bekatiga qurbonlar xotirasini abadiylashtirishni ifodalovchi nom berish g‘oyasini qo‘llab-quvvatlagan.

Bugun, 19-dekabr kuni “Yangi O‘zbekiston — yangi saylovlar” munozaralar klubining ishtirokchilari halok bo‘lgan metro quruvchilarining xotirasini bir daqiqalik sukut saqladi. “Gazeta.uz”ning yozishicha, bunday tashabbus bilan “Human.uz” sayti jurnalisti Mavjuda Mirzayeva chiqqan.

Tadbir ishtirokchilari orasida AOKA rahbari Komil Allamjonov, Jurnalistika va ommaviy kommunikatsiyalar universiteti rektori Sherzod Qudratxo‘jayev, boshqa mansabdor shaxslar, parlament a’zolari va fuqarolik jamiyati vakillari bo‘lgan.

Avvalroq Musulmonlar idorasi Yunusoboddagi fojia oqibatida halok bo‘lganlarning oila a’zolariga hamdardlik bildirgan edi.