Telegram’dagi “Fayzbog‘.uz” kanaliga Yunusobod metro yo‘nalishida sodir bo‘lgan avariya yuzasidan ma’lumotlar kelib tushdi, deb yozmoqda “Effect.uz”.
O‘zini “Qo‘qon-Lokomotiv Deposi” xodimi deb tanishtirgan kanal obunachisi depo xodimlari Toshkent metro qurilishiga majburiy jalb qilinayotganini bildirgan. Qo‘yida ushbu suhbat to‘lig‘icha keltirildi.
Obunachi: “Qo‘qon-Lokomotiv Deposi”da ishlayman. Ma’lumotim oliy. Navbati bilan metro qurilishga jo‘natishadi. Garchi qurilish sohasini bilmasak ham.
“Fayzbog‘.uz”: Avariya bo‘lgan hududga majburiy yuborishyaptimi? Siz qaysi kunlari ishlashga bordingiz?
Obunachi: Avgust oyidan dekabr oyigacha 3 marotaba 15 kundan ishlab keldim. Bundan avval ham shunga o‘xshash hodisa sodir bo‘lgandi. Shu oyning boshi, 6-dekabr sanasida qattiq yomg‘ir yog‘ayotgan paytda ham bizni ishlashga majburlashgan. Lekin bu holat “Turkiston” stansiyasida sodir bo‘lgan. Avariya sodir bo‘lgan bekatdan keyingi bekatda (Yunusoboddan keyingi bekat - “Fayzbog‘.uz”).
“Fayzbog‘.uz”: 6-dekabr “Turkiston” stansiyasida jabrlanganlar bo‘ldimi?
Obunachi: Yo‘q, bo‘lmagandi. Lekin qattiq yomg‘ir ostida stansiyaga tushib, betonini quyayotgan edik.
“Fayzbog‘.uz”: Metro qurilishiga majburiy jalb etish hali ham davom etmoqdami?
Obunachi: Hozir ham metro qurilishiga tashkilotimizdan ishchilar jo‘natilgan. Aynan “Yunusobod” mavzesiga. Hamkasblarim avariya hududida edi. Telefonlariga qo‘ng‘iroq qilib tusholmayapman.
Eslatib o‘tamiz, Toshkent metropolitenining yangi qurilayotgan Yunusobod yo‘nalishi uchun Yunusobod tumanida Mega Planet oldida tunnel qazilayotgan bo‘lgan. 18-dekabr kuni tinimsiz yomg‘ir yog‘gan. Suv tunnelga tushmasligi uchun beton lotok qilingan. Ana shu lotokning qaysidir qismidan suv ketgan va suv to‘plangan. Yog‘ingarchilik kuchaygan vaqtda yer bo‘shab quruvchilar ishlayotgan tunnelni bosib qolgan.
Prezident topshirig‘iga muvofiq sodir bo‘lgan hodisa sabablari va oqibatlarini joyida o‘rganish, zudlik bilan bartaraf etish, jabrlanganlar va ularning oila a’zolariga yordam ko‘rsatish maqsadida hukumat komissiyasi tuzilgan.
FVV tomonidan voqea joyida olib borilgan tezkor qidiruv-qutqaruv ishlari natijasida olti nafar fuqaroning jasadi tuproq ostidan olib chiqilib, ularning shaxsi aniqlangan. Qidiruv-qutqaruv ishlari yakunlanib, Komissiya ishining birinchi fazasi nihoyasiga yetdi.
Pudratchi-quruvchi tashkilotlar tomonidan ularning oila-a’zolari va yaqinlariga 100 million so‘mlik dastlabki tovon pullari to‘lab berilgan. Shu bilan birga, amaldagi qonunchilikka asosan qo‘shimcha kompensatsiya pullari to‘lab beriladi.
Hodisa yuzasidan jinoyat ishi qo‘zg‘atilgan.
Izoh (0)