Kechikkan “El-Klasiko”

Kataloniyadagi tartibsizliklar sabab millionlab muxlislar orziqib kutgan “Barselona” hamda “Real” o‘rtasidagi uchrashuv 26-oktabrda emas, balki 18-dekabrda bo‘lib o‘tishi qaysidir ma’noda muxlislarning hovurini biroz bo‘lsa-da bosilishga olib keldi. Biroq jamoalar “El-Klasiko”ga shunday ko‘rinishda yetib keldiki, o‘yinga bo‘lgan qiziqish yanada ortdi, nazarimizda.

“Barselona” ham avvalgi “El-Klasiko”lardan farqli o‘laroq hozir o‘ta optimal formasida emas. To‘g‘ri Leo Messi va Luis Suares tandemi so‘nggi o‘yinlarda raqiblarning dodini bermoqda. Yozda 125 million yevroga sotib olingan Antuan Grizmann esa hamon katalon klubiga moslashish bilan band. Har holda uning o‘yinlari shuni ko‘rsatmoqda. Bundan tashqari, klubning ko‘plab muxlislari “Barselona” ko‘rsatayotgan o‘yin va Ernesto Valverdening ishidan norozi. Ammo Messi deb atalmish dahoning borligi ushbu jamoadagi kamchiliklarni yopib qo‘yayotgani ayni haqiqat. Biroq Messi ham butun jamoa emasligi Mersisayd, Rimdagi kabi (o‘tgan yilgi Chempionlar Ligasi yarim finalida “Liverpul”ga yutqazgandi, undan oldin esa “Roma”ga) bahslarda ko‘rinib qoladi. Shunday ekan, bugungi o‘yinda “Barselona” yaqqol favorit emas. Ammo Messi va “Kamp Nou” bugun “Barselona”ning biroz bo‘lsa-da ustunligini o‘zida ifoda etadi. Katalonlar darvoza va maydon markazidan xavotirlanmasa bo‘laveradi. Markazda ilk “El-Klasiko”sini orziqib kutayotgan Frenki de Yong allaqachon kataloniyaliklar yoqimtoyiga aylanib ulgurdi. Serxi Buskets esa bir maromda o‘ynashni davom ettirmoqda. Faqatgina Artur jarohat sabab bugungi bahsni o‘tkazib yuboradi. Uning o‘rnini esa Ivan Rakitich hamda Arturo Vidal yopishga harakat qiladi. Biroq himoya haqida bunday deb bo‘lmaydi. Himoyada muammolar borligini jamoaning ko‘p gol o‘tkazib yuborayotganidan ham bilsa bo‘ladi. Ammo darvozadan ko‘ngilni to‘q qilish mumkin. Boisi Mark Andre ter-Shtegen ayni damda dunyoning eng yaxshi posbonlaridan biri ekanligini deyarli har bir bahsda isbot etmoqda.

“Real” haqida ham “Barselona”ga uyqash fikrlarni bildirish mumkin. Zinedin Zidan klub boshqaruviga qaytganidan beri yangi jamoani shakllantirish bilan ovora. Nimadir endi o‘xshadi deb turganda, kutilmagan jarohatlar “Real”ga xalaqit berib qo‘ymoqda. Avvaliga Markos Asensio, Xames mana endi Marselo va Azar. Yozda katta umidlar bilan olib kelingan Eden Azar jamoaga endi moslashib ulgurdi degan vaqtda jarohat oldi. Ha, Azarning so‘nggi bahslaridagi harakatlari uning “Qirollik klubi” yetakchisiga aylanayotganidan dalolat beradi. To‘g‘ri, u kam gol urmoqda, biroq uning maydonda bajarayotgan foydali ish koeffitsiyenti sabab Karim Benzema La Ligada to‘purarga aylandi. 18 yoshli Rodrigo esa jamoaning ikkinchi raqamli to‘purari bo‘lib turibdi. Azarning butun maydon bo‘ylab harakatlanishi va raqiblarning uni yopishga intilishi sababdan Benzema va Rodrigo juda katta bo‘sh hududga ega bo‘lmoqda. Azarning jarohati jamoa o‘yiniga ta’sir qilmasdan qolmaydi, albatta. Marseloning jarohati haqida ham shunday fikr bildirish mumkin. To‘g‘ri, Ferlan Mendi bor, biroq uning hujumdagi faolligi braziliyalik darajasida emas. “Real” muxlislarini xursand qiladigan bir jihat bor. Bu ham bo‘lsa, Zidanning yangi topilmasi — Federiko Valverde. Zidan “Real” boshqaruvini birinchi marta qo‘lga olganda Kazemiro maydon markazidagi asosiy bo‘g‘in vazifasini o‘tagandi. Hozir esa Kroos va Kazemiroga asosiy yordamchi vazifasini Modrich emas, balki Valverde o‘tab bermoqda. Aynan uning o‘ng qanotga yaqin hududdagi ishonchli harakatalari sabab 2018-yilgi “Oltin to‘p” sohibi Luka Modirch ko‘plab o‘yinlarni zaxiradan kuzatishga majbur bo‘lmoqda. Vaqtida Zidan Mateo Kovachichni Leo Messiga “qo‘riqchi” sifatida qo‘ygan va xorvat buni yaxshi uddalagan edi. Bugung ham, balki, Fede shunday vazifani bajarishi ehtimol.