Кечиккан «Эль-Класико»

Каталониядаги тартибсизликлар сабаб миллионлаб мухлислар орзиқиб кутган «Барселона» ҳамда «Реал» ўртасидаги учрашув 26 октябрда эмас, балки 18 декабрда бўлиб ўтиши қайсидир маънода мухлисларнинг ҳовурини бироз бўлса-да босилишга олиб келди. Бироқ жамоалар «Эль-Класико»га шундай кўринишда етиб келдики, ўйинга бўлган қизиқиш янада ортди, назаримизда.

Боиси, Ла Лигада 17-тур ортда қолди. 16 тадан ўйин ўтказган иккала жамоанинг очколари тенг. Тўпурарлар борасида ҳам тенглик. Месси ва Бензема рақибларини бир хил 12 мартадан ранжитишга эришди. Тўғри, бу жамоалар майдонга тушганда мусобақа жадвалидаги ўрин аҳамият касб этмайди. Лекин «Камп Ноу»даги ўйин бу сафар бошқачароқ, яъни мусобақа пешқадамлиги учун кечиши ҳам рад этиб бўлмас факт.

«Барселона» ҳам аввалги «Эль-Класико»лардан фарқли ўлароқ ҳозир ўта оптимал формасида эмас. Тўғри Лео Месси ва Луис Суарес тандеми сўнгги ўйинларда рақибларнинг додини бермоқда. Ёзда 125 миллион еврога сотиб олинган Антуан Гризманн эса ҳамон каталон клубига мослашиш билан банд. Ҳар ҳолда унинг ўйинлари шуни кўрсатмоқда. Бундан ташқари, клубнинг кўплаб мухлислари «Барселона» кўрсатаётган ўйин ва Эрнесто Вальверденинг ишидан норози. Аммо Месси деб аталмиш даҳонинг борлиги ушбу жамоадаги камчиликларни ёпиб қўяётгани айни ҳақиқат. Бироқ Месси ҳам бутун жамоа эмаслиги Мерсисайд, Римдаги каби (ўтган йилги Чемпионлар Лигаси ярим финалида «Ливерпуль»га ютқазганди, ундан олдин эса «Рома»га) баҳсларда кўриниб қолади. Шундай экан, бугунги ўйинда «Барселона» яққол фаворит эмас. Аммо Месси ва «Камп Ноу» бугун «Барселона»нинг бироз бўлса-да устунлигини ўзида ифода этади. Каталонлар дарвоза ва майдон марказидан хавотирланмаса бўлаверади. Марказда илк «Эль-Класико»сини орзиқиб кутаётган Френки де Йонг аллақачон каталонияликлар ёқимтойига айланиб улгурди. Серхи Бускетс эса бир маромда ўйнашни давом эттирмоқда. Фақатгина Aртур жароҳат сабаб бугунги баҳсни ўтказиб юборади. Унинг ўрнини эса Иван Ракитич ҳамда Aртуро Видаль ёпишга ҳаракат қилади. Бироқ ҳимоя ҳақида бундай деб бўлмайди. Ҳимояда муаммолар борлигини жамоанинг кўп гол ўтказиб юбораётганидан ҳам билса бўлади. Аммо дарвозадан кўнгилни тўқ қилиш мумкин. Боиси Марк Андре тер-Штеген айни дамда дунёнинг энг яхши посбонларидан бири эканлигини деярли ҳар бир баҳсда исбот этмоқда.

«Реал» ҳақида ҳам «Барселона»га уйқаш фикрларни билдириш мумкин. Зинедин Зидан клуб бошқарувига қайтганидан бери янги жамоани шакллантириш билан овора. Нимадир энди ўхшади деб турганда, кутилмаган жароҳатлар «Реал»га халақит бериб қўймоқда. Аввалига Маркос Асенсио, Хамес мана энди Марсело ва Азар. Ёзда катта умидлар билан олиб келинган Эден Азар жамоага энди мослашиб улгурди деган вақтда жароҳат олди. Ҳа, Азарнинг сўнгги баҳсларидаги ҳаракатлари унинг «Қироллик клуби» етакчисига айланаётганидан далолат беради. Тўғри, у кам гол урмоқда, бироқ унинг майдонда бажараётган фойдали иш коэффициенти сабаб Карим Бензема Ла Лигада тўпурарга айланди. 18 ёшли Родриго эса жамоанинг иккинчи рақамли тўпурари бўлиб турибди. Азарнинг бутун майдон бўйлаб ҳаракатланиши ва рақибларнинг уни ёпишга интилиши сабабдан Бензема ва Родриго жуда катта бўш ҳудудга эга бўлмоқда. Азарнинг жароҳати жамоа ўйинига таъсир қилмасдан қолмайди, албатта. Марселонинг жароҳати ҳақида ҳам шундай фикр билдириш мумкин. Тўғри, Ферлан Менди бор, бироқ унинг ҳужумдаги фаоллиги бразилиялик даражасида эмас. «Реал» мухлисларини хурсанд қиладиган бир жиҳат бор. Бу ҳам бўлса, Зиданнинг янги топилмаси — Федерико Вальверде. Зидан «Реал» бошқарувини биринчи марта қўлга олганда Каземиро майдон марказидаги асосий бўғин вазифасини ўтаганди. Ҳозир эса Кроос ва Каземирога асосий ёрдамчи вазифасини Модрич эмас, балки Вальверде ўтаб бермоқда. Айнан унинг ўнг қанотга яқин ҳудуддаги ишончли ҳаракаталари сабаб 2018 йилги «Олтин тўп» соҳиби Лука Модирч кўплаб ўйинларни захирадан кузатишга мажбур бўлмоқда. Вақтида Зидан Матео Ковачични Лео Мессига «қўриқчи» сифатида қўйган ва хорват буни яхши уддалаган эди. Бугунг ҳам, балки, Феде шундай вазифани бажариши эҳтимол.