Ispaniya chempionatining 10-tur qoldirilgan uchrashuvi doirasida “Barselona” jamoasi o‘z maydonida “Real Madrid”ni qabul qiladi. O‘yin 18-dekabrdan 19-dekabrga o‘tar kechasi 00:00da boshlanadi.
“Daryo” ushbu uchrashuvga oid qiziqarli fakt va statistikalarni taqdim etadi.
“Barselona” va “Real” barcha musobaqalar doirasida jami 242 marta to‘qnash kelgan. Ularning 96 tasida kataloniyaliklarning qo‘li baland kelgan bo‘lsa, “Real” 95 marta yutuqqa erishgan. Yana 51 o‘yinda durang qayd etilgan. 2019-yilning mart oyida “Barselona” 88 yil deganda ilk bor o‘zaro o‘yinlardagi g‘alabalar soni bo‘yicha “Real”ni ortda qoldirgandi.
Ushbu jamoalar o‘rtasidagi ilk o‘yin 1902-yilning 13 may kuni bo‘lib o‘tgan. Unda katalonlar 3:1 hisobida zafar quchgan. Ispaniya chempionati doirasidagi birinchi o‘yin esa 1929-yil, liga tashkil etilgan paytda bo‘lib o‘tgan va unda madridilkar 2:1 hisobida g‘alaba erishgan. Ma’lumot uchun, “Barselona” va “Real” shuningdek, Bilbaoning “Atletik” klubi Ispaniya oliy divizionida muntazam ishtirok etib kelayotgan jamoalar hisoblanadi.
Mavzuga doir: “Barselona” yana “Real”ga qarshi. “El-Klasiko” borasidagi bilimlaringizni sinab ko‘ring!
Klasiko tarixidagi eng uzun mag‘lubiyatsiz seriya “Barselona”ga tegishli. 1917-yilning noyabridan 1928-yilning iyuniga qadar katalonlar ketma-ket 13 ta o‘yinda “Real”ga yutqazmagan. “Qaymoqranglilar”ning esa bu boradagi eng yaxshi ko‘rsatkichi 10 ta o‘yinga teng (1931-yil yanvaridan 1935-yilning fevraliga qadar).
“Real” 1984—2003-yillar mobaynida “Kamp Nou”da birorta g‘alabaga erisha olmagan. “Real” o‘zining eng yaxshi holatida bo‘ladimi yoki “Barselona” eng yomon formadami, farqi yo‘q. 19 yil mobaynida Barselonada qo‘lga kiritilgan bir ochko “Real” uchun yaxshi natija hisoblangan. Bu seriyaga 2003-yilning 7-dekabrida “Galaktikos” tomonidan nuqta yo‘qilgandi. O‘shanda Roberto Karlos va Ronaldoning golliga Patrik Klyuyvert yagona kiritilagn to‘p bilan javob qaytargandi.
1948-yilning yanvaridan 1954-yilning noyabriga qadar “El-Klasiko” o‘yinlarida murosa yo‘li tanlanmagan. Jamoalar ketma-ket 18 ta uchrashuvda g‘olib nomini aniq qilgan va bu rekord hisoblanadi.
Leo Messi faoliyati mobaynida 41 marta “Real”ga qarshi o‘yin o‘tkazgan. Argentinalik futbolchi bu o‘yinlarda 26 gol va 14 ta masarali uzatma amalga oshirgan. Messi klasiko tarixidagi eng yaxshi to‘purar hisoblanadi.
“Barselona” barcha musobaqalarni inobatga olganda “Real”ga qarshi kechgan so‘nggi oltita uchrashuvda mag‘lubiyatga uchramadi.
“Barselona” La Liga doirasidagi so‘nggi to‘rtta uy o‘yinida kamida to‘rttadan gol urmoqda —“Malyorka” (5:2), “Selta” (4:1), “Valyadolid” (5:1), “Sevilya” (4:0). Bundan tashqari ushbu mavsumdagi yettita uy o‘yinidan faqat bittasida yirik hisob qayd etilmagan.
“Real” Primerada so‘nggi yettita o‘yindan buyon mag‘lubiyatsiz seriya qayd etmoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)