O‘zbekiston Davlat san’at muzeyi direktori o‘rinbosari lavozimida ishlagan N.A. fuqarolik ishlari bo‘yicha sudlarning ishga tiklashni rad etish haqidagi qarorlaridan norozi bo‘lib, O‘zbekiston Respublikasi Bosh prokuraturasiga murojaat yo‘llagan. Bu haqda Bosh prokuratura xabar berdi.
Ma’lum qilinishicha, N.A. O‘zbekiston Davlat san’at muzeyi direktorining 2017-yil 21-avgustdagi buyrug‘i bilan mazkur muzeyning ilmiy ishlar bo‘yicha direktor o‘rinbosari lavozimiga ishga qabul qilingan. Biroq muzey direktorining 2017-yil 29-dekabrdagi buyrug‘iga asosan N.A. bilan tuzilgan mehnat shartnomasi shtatlar soni qisqarganligi munosabati bilan bekor qilingan.
N.A.ning ishga tiklash haqidagi da’vosi Fuqarolik ishlari bo‘yicha Mirobod tumanlararo sudida ko‘rib chiqilgan. Ushbu sudning 2018-yil 31-maydagi hal qiluv qarori va Toshkent shahar sudi kassatsiya instansiyasining 2018-yil 7-dekabrdagi ajrimi bilan N.A.ning da’vo talablari rad etilgan.
Mazkur sud qarorlari Oliy sud fuqarolik ishlari bo‘yicha sudlov hay’atining 2019-yil 27-maydagi ajrimi bilan o‘zgarishsiz qoldirilgan.
N.A.ning murojaati Bosh prokuraturada ko‘rib chiqilib, ushbu holatda N.A. ishdan asossiz ravishda bo‘shatilganligi aniqlandi.
Xususan, mehnat shartnomasi bekor qilingan vaqtda N.A. Madaniyat vazirining buyrug‘iga ko‘ra xizmat safarida bo‘lganligi va homilador bo‘lganligi hamda boshqa holatlar inobatga olinmasdan, Mehnat kodeksining 102 (xodimni ogohlantirish), 137 (homilador ayol bilan mehnat shartnomasini bekor qilishni cheklash) va boshqa moddalari talablari buzilgan.
Shunga asosan, Bosh prokuratura tomonidan yuqoridagi sud qarorlariga nisbatan 2019-yil 11-sentabrda Oliy sud rayosatiga protest kiritilgan.
Oliy sud sudlov hay’ati tomonidan ish yangidan ko‘rib chiqilib, 2019-yil 4-noyabrda N.A.ning da’vo talablari qanoatlantirilgan.
Izoh (0)