Ўзбекистон Давлат санъат музейи директори ўринбосари лавозимида ишлаган Н.А. фуқаролик ишлари бўйича судларнинг ишга тиклашни рад этиш ҳақидаги қарорларидан норози бўлиб, Ўзбекистон Республикаси Бош прокуратурасига мурожаат йўллаган. Бу ҳақда Бош прокуратура хабар берди.
Маълум қилинишича, Н.А. Ўзбекистон Давлат санъат музейи директорининг 2017 йил 21 августдаги буйруғи билан мазкур музейнинг илмий ишлар бўйича директор ўринбосари лавозимига ишга қабул қилинган. Бироқ музей директорининг 2017 йил 29 декабрдаги буйруғига асосан Н.А. билан тузилган меҳнат шартномаси штатлар сони қисқарганлиги муносабати билан бекор қилинган.
Н.А.нинг ишга тиклаш ҳақидаги даъвоси Фуқаролик ишлари бўйича Миробод туманлараро судида кўриб чиқилган. Ушбу суднинг 2018 йил 31 майдаги ҳал қилув қарори ва Тошкент шаҳар суди кассация инстанциясининг 2018 йил 7 декабрдаги ажрими билан Н.А.нинг даъво талаблари рад этилган.
Мазкур суд қарорлари Олий суд фуқаролик ишлари бўйича судлов ҳайъатининг 2019 йил 27 майдаги ажрими билан ўзгаришсиз қолдирилган.
Н.А.нинг мурожаати Бош прокуратурада кўриб чиқилиб, ушбу ҳолатда Н.А. ишдан асоссиз равишда бўшатилганлиги аниқланди.
Хусусан, меҳнат шартномаси бекор қилинган вақтда Н.А. Маданият вазирининг буйруғига кўра хизмат сафарида бўлганлиги ва ҳомиладор бўлганлиги ҳамда бошқа ҳолатлар инобатга олинмасдан, Меҳнат кодексининг 102 (ходимни огоҳлантириш), 137 (ҳомиладор аёл билан меҳнат шартномасини бекор қилишни чеклаш) ва бошқа моддалари талаблари бузилган.
Шунга асосан, Бош прокуратура томонидан юқоридаги суд қарорларига нисбатан 2019 йил 11 сентябрда Олий суд раёсатига протест киритилган.
Олий суд судлов ҳайъати томонидан иш янгидан кўриб чиқилиб, 2019 йил 4 ноябрда Н.А.нинг даъво талаблари қаноатлантирилган.
Изоҳ (0)