O‘zbekiston Prezidenti Shavkat Mirziyoyevning Yaponiyaga rasmiy tashrifi arafasida Surxondaryo viloyati Sho‘rchi tumanidagi 43-umumiy o‘rta ta’lim maktabiga yaponiyalik arxeolog Kyudzo Kato nomi berildi. Shu munosabat bilan tashkil etilgan tadbir joriy yilning 17-dekabr kuni o‘tkazildi. Bu haqda O‘zbekiston Xalq ta’limi vazirligi xabar berdi.
Ma’lum qilinishicha, marosimda O‘zbekiston xalq ta’limi vaziri o‘rinbosari Dilshod Kenjayev, Yaponiyaning O‘zbekistondagi elchixonasi hamda jamoatchilik vakillari ishtirok etgan.
Vazirlik tomonidan ta’kidlanishicha, Kyudzo Kato arxeolog, antropolog, tarixchi va etnograf bo‘lgan. U O‘zbekistonning tarixi va qadimiy obidalarini o‘rgangan. Arxeolog uzoq yillar davomida O‘zbekiston fanlar akademiyasi bilan hamkorlik olib borgan. Surxondaryo viloyatidagi Dalvarzintepa, Qoratepa, Xolchayon, Fayoztepa arxeologik qazishmalarida qatnashgan.
“Dunyo” axborot agentligining ma’lum qilishicha, 2020-yilda O‘zbekistonda Kyudzo Kato nomidagi yodgorlik kompleksi va muzey tashkil qilinadi.
Olim O‘zbekiston tarixini Yaponiyada ommalashtirgan. Shuningdek, u Markaziy Osiyo va Sibir haqidagi o‘nlab kitoblarning muallifi. O‘zbekistonga bag‘ishlangan turli simpozium va ko‘rgazmalarni tashkil etgan. Amir Temur, Bobur, Mirzo Ulug‘bek va boshqa ulug‘ mutafakkirlar asarlarini yapon tiliga tarjima qilgan. Markaziy Osiyoda, ayniqsa O‘zbekiston janubida buddizm madaniyatini o‘rgangan.
2002-yilda o‘zbek xalqining boy tarixi, qadimiy yodgorliklari hamda madaniy-ma’naviy merosini chuqur o‘rganish va xorijda targ‘ib qilishdagi katta xizmatlari, O‘zbekiston va Yaponiya o‘rtasidagi ilmiy aloqalarni rivojlantirishga qo‘shgan samarali hissasi uchun Kyudzo Kato “Do‘stlik” ordeni bilan mukofotlangan.
Dilshod Kenjayevning so‘zlariga ko‘ra, 2020/2021-o‘quv yilidan boshlab Kyudzo Kato nomidagi maktab o‘quvchilari ingliz tili bilan birga yapon tilini ham o‘rganish imkoniyatiga ega bo‘ladi. Bu maktab keyingi o‘quv yilidan boshlab yapon va ingliz tillariga ixtisoslashtirilgan yosh arxeologlar maktabiga aylantiriladi.
Shu bilan birga, maktabda Kato Kyudzo muzey-xonasi tashkil etiladi. Bu yerga tashrif buyurganlar yaponiyalik olim hayoti va faoliyati bilan tanishish imkoniyatiga ega bo‘ladi.
Vazirlik tomonidan qayd etilishicha, joriy yilning avgust oyida qabul qilingan Vazirlar Mahkamasining “Umumiy o‘rta ta’lim muassasalarida xorijiy tillarni o‘qitishni yanada takomillashtirish chora-tadbirlari to‘g‘risida”gi qaroriga ko‘ra, respublikaning barcha hududlarida 15 ta yapon tiliga ixtisoslashtirilgan davlat umumta’lim muassasasi tashkil etiladi. 2020/2021-o‘quv yilidan boshlab beshta maktabda yapon tili o‘qitiladi.
Izoh (0)