Qozog‘iston prezidenti Olmaota shahri nomini o‘zgartirish taklifini qo‘llab-quvvatladi

Qozog‘iston prezidenti Qosim-Jo‘mart Toqayev Olmaota shahri nomini avvalgi holiga — Olma-otaga qaytarish taklifini qo‘llab-quvvatladi, deb xabar beradi “RIA Novosti”.

Mazkur taklif yozuvchi va jamoatchilik arbobi O‘ljas Sulaymonov tomonidan ilgari surilgan edi.

“Olma-ota nomi anchayin ko‘lamli va tushunarli. Jarangdor va tarixiy mazmunga ega. Olmaota esa juda tor doiradagi odamlar uchun nomlangan”, — deydi Sulaymonov.

Yozuvchining aytishicha, u ushbu taklifni Toqayev bilan bo‘lib o‘tgan uchrashuvda bildirgan va uning qo‘llab-quvvatloviga sazovor bo‘lgan. Shu bilan birga, Qozog‘iston prezidenti mazkur masalani xalqning o‘zi hal etishi lozimligini qayd etib o‘tgan.

Eslatib o‘tamiz, joriy yilning mart oyida Qozog‘istonning Ostona shahri nomi Nur-Sultonga o‘zgartirilgan edi. 2014-yida esa Nursulton Nazarboyev Qozog‘istonning nomini o‘zgartirishni ham taklif qilgan.