“Keling ‘Brekzit’ni tugatamiz”: Boris Jonson – Buyuk Britaniya parlament saylovlari yakuni haqida
Buyuk Britaniya bosh vaziri Boris Jonson o‘zi rahbarlik qilayotgan Konservatorlar partiyasining parlament saylovlaridagi g‘alabasini izohlash chog‘ida ‘Brekzit’ bo‘yicha ishni yakuniga yetkazishni va’da qilganini eslatdi. Bu haqda BBC News xabar qilgan.
“Parlament Britaniya xalqiga ishlashi uchun o‘zgarishi lozim. Keling ‘Brekzit’ga barham beramiz. Lekin do‘stlar avvaliga nonushta qilib olamiz”, – deydi Jonson.
Saylovlarning dastlabki natijalariga ko‘ra konservatorlar partiyasi 650 dan 352 mandat olgan, ovozlarni hisoblash jarayoni davom etmoqda.
Boris Jonson va Konservatorlar partiyasi Buyuk Britaniyaning Yevroittifoqdan tezroq chiqarishga urinmoqda. Mamlakatda navbatdan tashqari parlament saylovlarini o‘tkazishga Jonson taklifiga ko‘ra avvalgi chaqiriq ‘Brekzit’ haqidagi kelishuvni rad etganidan keyin qaror qilingan.
