Qarshi tumanining “Xoniyon” mahallasidagi 842 ta xonadon tabiiy gazdan uzib qo‘yilgani, ammo narigi ko‘chadagi “Jumabozor” mahallasi aholisi gaz bilan to‘liq ta’minlangani aholi o‘rtasida noroziliklarga sabab bo‘layotgani haqida avval xabar berilgan edi. So‘nggi ma’lumotlarga ko‘ra, xoniyonliklarga ham gaz berilgan, ammo mahalla ahli ushbu ijobiy holat faqat parlament saylovlari o‘tguniga qadar davom etishi mumkinligidan xavotirda.
Xoniyonlik Adham Saidov “Daryo” muxbiri bilan suhbatda ta’kidlashicha, mahalladagi 220 ta xonadonga tabiiy gaz tarmog‘iga ulanish uchun ruxsat berilgan. E’tiborga molik tomoni, mahalladagi 200 nafar bola tarbiyalanuvchi maktabgacha ta’lim tashkiloti, maktab va tibbiyot muassasasi ham gaz bilan ta’minlangan.
“26-noyabr kuni tabiiy gazga ulanishga ruxsat berishdi. 180—190 ta xonadon ulandik. 220 ta xonadonga ruxsat berilgan. Gazga ulanishni istaganlar birin-ketin ulanyapti”, — deydi Adham Saidov. Ayni vaqtda boshqa bir fuqaro — Xudoyor Ergashevning so‘zlariga ko‘ra, tuman gaz idorasi rahbari Zafar Gulov aholiga ulab berilgan gaz tez orada uzilishini aytgan.
Mavzuga doir: Aholi Qarshi tumangaz filialini aholiga gaz tarqatishda g‘irromlik qilishda ayblamoqda
“Bugungi kunda xalqni bunday ko‘zbo‘yamachilik bilan aldab bo‘lmaydi-ku, qanday qilib bu gapni aytishimiz mumkin?! Bunday reja yo‘q. Nasib etsa, aholi doimiy ravishda tabiiy gaz bilan ta’minlanadi”, — deydi Zafar Gulov. Qayd etish joiz, faqat “Xoniyon” mahallasi aholisiga tabiiy gazga ulanish uchun ruxsat berilgan — unga qo‘shni “Dasht” mahallasi ahli hamon gazsiz.
Ushbu holatga izoh berarkan, tuman gaz idorasi rahbari Zafar Gulov shunday deydi: “Hamma qishloqlarni gazga ulab tashlasak, tuman markazidagi ijtimoiy soha obyektlari — maktab, bog‘cha va shifoxonalarga gaz yetkazib berolmay qolamiz. Shuning uchun barcha xonadonlarni birdan gaz tarmog‘iga ulay olmaymiz”.
Eslatib o‘tamiz, avvalroq xoniyonliklarning gaz muammosi ko‘tarilgan “Daryo”dagi maqolaga “O‘ztransgaz”ning Qashqadaryo bo‘yicha hududiy filiali e’tiroz bildirgan, maqolada tilga olingan muammolarni tan olmagan edi. Kompaniya o‘z raddiyasida “Xoniyon” mahallasi aholisining tabiiy gazga ehtiyoji yo‘qligi, uar suyultirilgan gaz bilan ta’minlanganini ta’kidlagan edi.
Izoh (0)