Majburiy ijro byurosining Bag‘dod tuman bo‘limi tomonidan “Toza-hudud” korxonasi Bag‘dod filialida Prezidentning 2018-yilning 22-noyabridagi “Qattiq maishiy chiqindilarni to‘plash va olib chiqish uchun to‘lovlarni to‘lash tizimini tubdan takomillashtirish chora-tadbirlari to‘g‘risida”gi Farmoni ijrosi yuzasidan tekshirish o‘tkazildi. Bu haqda MIB matbuot xizmati “Daryo”ga xabar berdi.
Aniqlanishicha, Bag‘dod “Toza hudud” tashkiloti haydovchisi A.K. aholiga ko‘rsatilgan xizmatlar uchun iste’molchilardan pul tushumlarini undirish vakolati bo‘lmagani holda, 2019-yil iyul—oktabr oylari davomida jami 101 nafar fuqarolarning ishonchiga kirib, ularni aldab, pullarni korxona g‘aznasiga kirim qilishini aytib, maishiy chiqindilarni to‘plash va olib chiqish xizmatlari uchun mo‘ljallangan to‘lov kvitansiyalariga soxta yozuvlar kiritish yo‘li bilan jami 5 million 720 ming so‘m pulni yig‘ib olgan.
Bu ham yetmaganday aholidan olgan pul mablag‘larini “Toza hudud” tashkiloti Clean city bazasiga kirim qilmasdan, o‘zining shaxsiy manfaatlari yo‘lida sarflab yuborgan.
Mazkur holat yuzasidan A.K.ga nisbatan MIB Bag‘dod tumani bo‘limi tomonidan 2019-yilga 21-noyabrda Jinoyat kodeksining 168-moddasi (firibgarlik) 1-qismi bilan jinoyat ishi ko‘zg‘atilib, hozirda Bag‘dod tuman prokuraturasi tomonidan dastlabki tergov olib borilmoqda.
Izoh (0)