Қарши туманининг «Хониён» маҳалласидаги 842 та хонадон табиий газдан узиб қўйилгани, аммо нариги кўчадаги «Жумабозор» маҳалласи аҳолиси газ билан тўлиқ таъминлангани аҳоли ўртасида норозиликларга сабаб бўлаётгани ҳақида аввал хабар берилган эди. Сўнгги маълумотларга кўра, хониёнликларга ҳам газ берилган, аммо маҳалла аҳли ушбу ижобий ҳолат фақат парламент сайловлари ўтгунига қадар давом этиши мумкинлигидан хавотирда.
Хониёнлик Адҳам Саидов «Дарё» мухбири билан суҳбатда таъкидлашича, маҳалладаги 220 та хонадонга табиий газ тармоғига уланиш учун рухсат берилган. Эътиборга молик томони, маҳалладаги 200 нафар бола тарбияланувчи мактабгача таълим ташкилоти, мактаб ва тиббиёт муассасаси ҳам газ билан таъминланган.
«26 ноябрь куни табиий газга уланишга рухсат беришди. 180—190 та хонадон уландик. 220 та хонадонга рухсат берилган. Газга уланишни истаганлар бирин-кетин уланяпти», — дейди Адҳам Саидов. Айни вақтда бошқа бир фуқаро — Худоёр Эргашевнинг сўзларига кўра, туман газ идораси раҳбари Зафар Гулов аҳолига улаб берилган газ тез орада узилишини айтган.
«Қарши туман газ идораси раҳбари билан суҳбатлашган қишлоқдошларимиз газимиз 22 декабрдаги сайловдан сўнг яна узилар экан, дейишди. Буни Зафар Гуловнинг ўзи айтибди. Хурсандчилигимиз узоққа чўзилмайдиган кўринади», — дейди Худоёр Эргашев. Фуқаро Адҳам Саидов эса газ қайта узилиши ҳақидаги гап-сўзлардан бехабарлигини айтди. Туман газ идораси раҳбари Зафар Гулов ҳам бу гапни рад этди.«Бугунги кунда халқни бундай кўзбўямачилик билан алдаб бўлмайди-ку, қандай қилиб бу гапни айтишимиз мумкин?! Бундай режа йўқ. Насиб этса, аҳоли доимий равишда табиий газ билан таъминланади», — дейди Зафар Гулов. Қайд этиш жоиз, фақат «Хониён» маҳалласи аҳолисига табиий газга уланиш учун рухсат берилган — унга қўшни «Дашт» маҳалласи аҳли ҳамон газсиз.
Ушбу ҳолатга изоҳ бераркан, туман газ идораси раҳбари Зафар Гулов шундай дейди: «Ҳамма қишлоқларни газга улаб ташласак, туман марказидаги ижтимоий соҳа объектлари — мактаб, боғча ва шифохоналарга газ етказиб беролмай қоламиз. Шунинг учун барча хонадонларни бирдан газ тармоғига улай олмаймиз».
Эслатиб ўтамиз, аввалроқ хониёнликларнинг газ муаммоси кўтарилган «Дарё»даги мақолага «Ўзтрансгаз»нинг Қашқадарё бўйича ҳудудий филиали эътироз билдирган, мақолада тилга олинган муаммоларни тан олмаган эди. Компания ўз раддиясида «Хониён» маҳалласи аҳолисининг табиий газга эҳтиёжи йўқлиги, уар суюлтирилган газ билан таъминланганини таъкидлаган эди.
Изоҳ (0)