Farg‘onada avtomobillarga gaz quyish shoxobchasida ikki kilometrga cho‘zilgan navbat yuzaga kelgani haqida “Daryo” tomonidan xabar berilgan edi. Farg‘ona viloyati IIB Yo‘l harakati xavfsizligi boshqarmasi matbuot xizmati mazkur xabarga munosabat bildirdi.
Ma’lum qilinishicha, kuz-qish mavsumi boshlanishi bilan avtomobillarga gaz to‘ldirish shoxobchalarida navbatga turgan avtotransport vositalarining soni ortmoqda. Buning asosiy sabab hozirgi kunda tabiiy gaz bosimining pastligi va aholi ehtiyojining ortganligi hisoblanadi.
“Farg‘ona magistral gaz quvurlari” boshqarmasi bergan ma’lumotga ko‘ra, bugungi kunda Farg‘ona viloyatiga keluvchi magistral gaz tarmoqlarida belgilangan bosim ko‘rsatkichlari pastligi sababli avtomobillarga gaz quyish shoxobchalarida siqilgan gaz quyishda bir qator muammolar yuzaga kelmoqda. Bu holatni bartaraf etish uchun “Farg‘ona magistral gaz quvurlari” boshqarmasi tomonidan bosimni ko‘tarish va bir maromda tabiiy gaz yetkazib berish yuzasidan ishlar olib borilmoqda.
Bu borada boshqarma tomonidan 14-noyabrdan buyon to‘rt marta “O‘ztransgaz” AJga murojaat qilingani aytilmoqda.
Ta’kidlanishicha, avtomobillarga gaz to‘ldirish shoxobchalari joylashgan yo‘llarda yuzaga kelayotgan navbatlarda turgan transport vositalari harakatini tartibga solish, yo‘l harakati xavfsizligini ta’minlash bo‘yicha Farg‘ona viloyati Ichki ishlar boshqarmasi Yo‘l harakati xavfsizligi boshqarmasi tomonidan maxsus chora-tadbirlar ishlab chiqilib, shoxobchalar yaqinidagi yo‘llarga yo‘l-patrul inspektorlarining xizmat olib borishlari tashkil etilmoqda.
Mavzuga doir: Qashqadaryodagi metan gaz quyish shoxobchalarida ham turnaqator navbat yuzaga keldi (foto)
Izoh (0)